رووداو دیجیتاڵ
بەفر لە پارێزگاکانی سێواس، وان، بەدلیس و جۆلەمێرگی باکووری کوردستان باری. لە سێواس بەهۆی بەفربارینەوە رێگەی 46 گوند داخرا.
بەگوێرەی راگەیێندراوی کارگێڕیی پارێزگای سێواس، ئەمڕۆ یەکشەممە 16 ـی تشرینی دووەمی 2025 بەهۆی بەفرەوە رێگەی 46 گوند لە پارێزگاکە داخران و تیمەکانیش بۆ کردنەوەی ئەو رێگەیانە دەستیان بە کارکردن کردووە.
هەر ئەمڕۆ لە پارێزگای وان، بەفر لە بەشێکی پارێزگاکەی باکووری کوردستان باری، لەوانەش شارۆچکەکانی ئەلباک و موکس.
لە رێگەی وان - موکس و لە رێگەی وان - جۆلەمێرگ بەهۆی بەفربارین و تەمەوە شۆفێران لە رۆیشتندا تووشی سەختی بوون.
بەیانی ئەمڕۆ لە پارێزگای بەدلیسیش بەفرباری. بەهۆی بەفرەکەوە ئۆتۆمبێلەکان بە بەفر داپۆشران و پارکەکان سپیپۆش بوون.
لە پارێزگای جۆلەمێرگیش بەهۆی ئەو بەفرەی لە شەودا دەستی پێکرد و پچڕ پچڕ بەردەوام بوو، سەنتەری شار سپیپۆش بوو.
تیمەکانی کارگێڕی تایبەتی پارێزگا و رێگەوبان، دەستیان بە کاری راماڵینی بەفر لە رێگەکان کرد و تیمەکانی هاتووچۆش شۆفێرانیان ئاگادارکردەوە کە بە هۆشیارییەوە شۆفێری بکەن.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ