ساسان عەونی، وەزیری شارەوانی و گەشتوگوزار
رووداو دیجیتاڵ
لە پایتەختی فەرەنسا رێوڕەسمێک بەبۆنەی رۆژی ئاڵای کوردستان بەڕێوەچوو، کە تێیدا رێز لە سەرۆکی شارەوانیی پاریس دەگیرێت. وەزیری شارەوانی و گەشتوگوزاری هەرێمی کوردستان دەڵێت، ''ئەو خاتوونە رۆڵێکی سەرەکی لە پتەوکردنی دۆستایەتیی نێوان گەلانی فەرەنسا و کوردستاندا هەبووە.''
ئەمڕۆ چوارشەممە 17-12-2025، نوێنەرایەتیی حکومەتی هەرێمی کوردستان لە فەرەنسا رێوڕەسمێکی بەبۆنەی رۆژی ئاڵای کوردستان رێکخست کە جیا لە بەشداریی ژمارەیەک کەسایەتیی کورد و فەرەنسی، شاندێکی هەرێمی کوردستانیش بە سەرپەرشتیی ساسان عەونی، وەزیری شارەوانی و گەشتوگوزار بەشدار بوون.
ساسان عەونی بە ئاڵا شاڵی، نێردراوی رووداوی لە پاریس رایگەیاند، ''ئێمە بە نوێنەرایەتیی جەنابی سەرۆکی حکومەتی هەرێمی کوردستان بەشدارین، بۆ ئەوەی سڵاو و رێزی جەنابیان بەو خاتوونە بەڕێزە بگەیێنین کە رۆڵێکی سەرەکی هەیە لە پتەوکردنی دۆستایەتیی نێوان گەلانی فەرەنسا و کوردستان، هەروەها زۆر دەستکەوتی باشی پیشکێس بەو دۆستایەتییە کردووە.''
بەگوتەی ساسان عەونی، ئان هیداڵگۆ، یەکێک لە بناخەدانەرانی دەستەخوشکیی نێوان پاریس و هەولێر بووە و رۆڵی لە بە ئەندامبوونی هەولێردا هەبووە لە کۆمەڵەی شارەوانییە فرانکۆفۆنییەکان.
5ـی ئەیلوولی ئەم ساڵ بە ئامادەبوونی سەرۆک بارزانی، رێڕۆی پێشمەرگە لە پارکێکی پاریس کرایەوە. وەزیری شارەوانی و گەشتوگوزار ئاماژەی دا، ''بۆیە ئەو خاتوونە شایەنی رێزگرتنی گەلی کوردستانە و سوپاس و ستایشی ئاراستە دەکەین.''
ساسانی عەونی لەکاتی خوێندنەوەی پەیامی حکومەتی هەرێمی کوردستانیش لە رێوڕەسمەکەدا ئاشکرای کرد، ''بڕیارە لە داهاتوودا خانوویەک لەنێو قەڵای دێرینی هەولێر ببێتە ماڵی پاریس، نۆژەن بکرێتەوە و بکرێتە ناوەندیک بۆ [پاراستنی] مافی ئافرەتان و کولتووری پێکەوەژیان، بۆیە دڵخۆش دەبین ئەو کات بەڕێزتان (ئان هیداڵگۆ) لە رێوڕەسمی کردنەوەیدا ئامادە ببن.''
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ