مزەفەر خۆشناو
رووداو- هەولێر
مەریوان بە مەبەستی گەیشتن بە ئەوروپا جانتای سەفەر دەكاتە شانی و دەچێتە ئێران، لەوێ چەند جارێك بەختی خۆی تاقیدەكاتەوە، بەڵام هەموو هەوڵەكانی شكست دێنن، بۆیە هەر لە ئێران دەمێنێتەوە و فێری زمانی فارسی دەبێت. مەریوان دەبێتە وەرگێڕ بۆ ئەو كەسانەی كە بە مەبەستی گەشت و نەخۆشی روویان لەو وڵاتە دەكرد، بەڵام ئێستا لەودیو شیشەكانی گرتووخانەی رەجایی شەهری تارانەوە، چاوەڕێی تەواوكردنی حوكمەكەی دەكات.
مەریوان عەبدولكەریم رەزا، ساڵی 1988 لە كەركووك لەدایك بووە. باوكی ئەنفالكراوە و دایكیشی لە ساڵی 1995 كۆچی دوایی كردووە. وەكو زۆر گەنجی دیكەی كورد، حەزی كردووە بچێتە ئەوروپا. بۆیە ساڵی 2004 دەچێتە ئێران، لەوێ زۆر هەوڵی داوە بە رێگەی قاچاخ خۆی بگەیەنێتە ئەوروپا، بەڵام لە هەوڵەكانی سەركەوتوو نەبووە، بۆیە هەر لە تاران دەمێنێتەوە و لەوێ كاری وەرگێڕی بۆ ئەو كەسانە كردووە كە بۆ چارەسەری نەخۆشی سەردانی ئەوێیان كردووە، بەڵام رۆژی 30/11/2012 لەلایەن هێزە ئەمنییەكانی ئێرانەوە دەستگیر دەكرێ.
مەریوان كە لە رێگەی چاتەوە قسەی بۆ (رووداو) كرد، دەڵێت هێزێكی ئەمنیی ئێران بە تۆمەتی تێكدانی ئەمنیەتی ئەو وڵاتە دەستگیریان كردووە. سەرەتا بۆ ماوەی حەوت مانگ لە گرتووخانەی ئێڤینی تاران لە ژوورێكی تاكەكەسیدا بووە و ئەشكەنجەیەكی زۆر دراوە. دواتر بۆ ماوەی مانگ و نیوێك گواستراوەتەوە گرتووخانەیەكی شاری كرماشان، لەوێش بەهەمانشێوە ئەشكەنجە دراوە.
مەریوان باسی دادگاییكردنەكەی دەكات و دەڵێت "لە دادگای ئینقیلاب لە تاران شوعبەی 28 دادگایی كرام، لەوێ بەبێ ئەوەی هیچ بەڵگەیەك هەبێ كە من ئەمنیەتی ئەو وڵاتەم تێكداوە، بە 33 ساڵ و سێ مانگ بەندكردن سزا درام".
دوای دوو ساڵ مانەوە لە گرتووخانە، حوكمەكەی مەریوان تەمیز دەكرێتەوە، بەو هۆیەوە سزاكەی لە 33 ساڵ و سێ مانگەوە كەم دەكرێتەوە بۆ حەوت ساڵ و شەش مانگ. مەریوان چوار ساڵی لە حوكمەكەی تەواو كردووە.
ئەو دەڵێت تاوەكو ئێستا چەند جارێك هەوڵی داوە سوود لەو رێككەوتنە وەربگرێ كە لە نێوان عێراق و ئێران بۆ گۆڕینەوەی گیراوان هەیە، بەڵام هەموو جارێك داواكەی رەتكراوەتەوە "دادوەر دەڵێت دۆسیەكەت سیاسییە و لە دەسەڵاتی مندا نییە، دۆسیەكەت لەلای ئیتلاعاتە".
مەریوان باسی رەوشی نێو زیندانەكەیان دەكات و دەڵێت "ئێمە 50 كەسین لە یەك هۆڵدا، 45 كەسمان كوردین، تەنیا من خەڵكی باشووری كوردستانم، ئەوانی دیكە كوردی رۆژهەڵاتن".
سەبارەت بە مامەڵەی بەرپرس و كارمەندانی گرتووخانەكە، مەریوان دەڵێت "ئەو زوڵمەی لە زیندان لە ئێمە دەكرێ، وەسف ناكرێ. دوو هۆڵی گیراوانی سیاسی هەن، یەكێكیان تایبەتە بە كورد و ئەوەی دیكەش تایبەتە بە لایەنگرانی میر حوسێن موسەوی و مەهدی كەڕووبی كە لە ساڵی 2009 دەستگیركراون، ئەوان هەموو شتێكیان بۆ دابین كراوە، بەڵام ئێمە بەهۆی كوردبوون و سوننەبوونمانەوە لە زۆر شت بێبەشین".
بە گوتەی مەریوان، ئەوان زۆر شتی ئاساییان لێ قەدەغەكراوە، نموونە بە سەردانی خۆی دێنێتەوە و دەڵێت "دوایینجار خوشكم و پوورێكم و پوورزایەكانم هاتبوون، تەنیا رێگەیان بە خوشكم دا و پوورم و پوورزایەكانم نەدی، بەڵام بۆ گیراوەكانی دیكە تاوەكو خزمی پلە چواریش ئاساییە سەردانیان بكەن". گوتیشی "تەنانەت مافی خۆدانە بەر هەتاویشمان لێ قەدەغە كراوە".
مەریوان زۆرتر لەبارەی رەوشی گرتووخانەكەی قسە دەكات و دەڵێت "پێشتر خواردنیان دەداینێ، بەڵام خواردنەكان زۆر خراپ و پیس بوون، پێمان نەدەخورا. داوامان كرد خۆمان دروستی بكەین، بەڵام كەرەستەكانمان بە نرخێكی زۆر گران بۆ دەهێنن".
لە ئێران چەند مافێك بە زیندانیان دراوە، بۆ نموونە ئەگەر نیوەی حوكمەكەت بەبێ كێشە تەواوكردبێ، بۆت هەیە تەنیا یەكجار داوای بەخشین بكەی، هەروەها دوای تەواوكردنی بەشێك لە حوكمەكەت داوای مۆڵەتی چوونە دەرەوە لەبەرامبەر دانانی بڕێك پارە بكەی، بەڵام هیچ یەكێك لەو مافانە مەریوان ناگرێتەوە.
مەریوان دەڵێ لە كاتی دادگاییكردنیدا چەند تۆمەتێكیان داوەتە پاڵی، لەوانە وێنەگرتن بە جلی سەربازی، هەڵگرتنی چەك، بەڵام دەڵێت "هیچ بەڵگەیەك نییە كە من وێنەم بە جلی سەربازییەوە گرتبێ، یان چەكم هەڵگرتبێ".
مەریوان تاوەكو ئێستا چەند جارێك لەرێگەی كەسوكارەكەیەوە هەوڵی داوە هەر هیچ نەبێ بگوازرێتەوە گرتووخانەیەكی هەرێمی كوردستان یان عێراق و لەوێ حوكمەكەی تەواو بكات، بەڵام هەموو هەوڵەكانی بێسوود بوون. دەشڵێت "قسەم لەگەڵ كاك بابەكر ناوێك كرد كە لە سەفارەتی عێراقە لە ئێران، بەرپرسی دۆسیەی ئاڵوگۆڕی گیراوەكانە، بەڵام ئەویش گوتی هیچم پێ ناكرێ، چونكە دۆسیەكەی تۆ لەلای ئیتلاعاتە".
مەریوان بە تامەزرۆییەوە چاوەڕێی ئەو رۆژە دەكات كە حوكمەكەی تەواو دەبێت و دەگەڕێتەوە زێدی خۆی. ئەو دەڵێت "زۆر بیری كەركووك و رەحیماوا و خێزانەكەم دەكەم".
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ