رووداو دیجیتاڵ
پارێزگای سلێمانی بەهۆی دابەزینی زۆری پلەکانی گەرماوە، بڕیاری دا رۆژانی سێشەممە و چوارشەممە دەوامی سەرجەم ناوەندەکانی خوێندن رابگیرێت.
هەڤاڵ ئەبوبەکر، پارێزگاری سلێمانی لە راگەیێندراوێکدا ئاماژەی بەوە کردووە، لەسەر بنەمای راپۆرتی وەزارەتی گواستنەوە و گەیاندن و لەپێناو پاراستنی سەلامەتی و تەندروستیی گشتیدا، بڕیاری راگرتنی دەوامیان داوە.
بەپێی بڕیارەکە، رۆژانی سێشەممە 20ی مانگ و چوارشەممە 21ی مانگ لە هەموو خوێندنگە و ناوەندەکانی خوێندنی حکومی و ناحکومیی سنووری پارێزگای سلێمانی دەوام رادەگیرێت.
دەقی راگەیێندراوی پارێزگای سلێمانی:
وەک پارێزگای سلێمانی، لەسەر بنەمای راپۆرتی وەزارەتی گواستنەوە و گەیاندنی حکومەتی هەرێمی کوردستان و، دوای راوێژکردن بە فەرمانگە پەیوەندیدارەکان و بەڕێوەبەرێتیی گشتیی پەروەردەی پارێزگای سلێمانی و یەکە کارگێڕییەکان، بەهۆی دابەزینی زۆری پلەکانی گەرما لە سنووری پارێزگای سلێمانی و، لە پێناوی پاراستنی سەلامەتیی و تەندروستیی گشتییدا؛ بڕیارماندا: سبەی 20 و، دووسبەی 21 ئەم مانگە، لە هەموو خوێندنگە و ناوەندەکانی خوێندنی حکومی و ناحکومی، دەوام رابگیرێت.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ