کۆمەڵ ئاڵا، ناوی حیزب و پۆستی ئەمیری گۆڕی

کۆنگرەی کۆمەڵ بۆ دوو رۆژ لە سلێمانی بەرێوەچوو. عەلی باپیر جارێکی دیکە وەک کەسی یەکەمی حیزبەکە هەڵبژێردرایەوە و 22 ئەندامی سەرکردایەتی هەڵبژێردران کە سێیان ژنن.

22 ئەندام بۆ ئەنجوومەنی سەرکردایەتی هەڵبژێدران، 18 پیاو و 4 ئافرەت، پێشتریش لەنێو کۆنفرانسە نێوخۆییەکانی حیزبەکەوە 12 کەس بە ئەندامی ئەنجوومەنەکە هەڵبژێردرابوون.

بەشێک لە ئەندامە هەڵبژێردراوەکان هەر ئەو کەسانەن کە پێشتریش سەرکردایەتی و خاوەن پۆستی باڵا بوون.

پەیوەند عومەر، گوتەبێژی کۆنگرەی کۆمەڵ بە تۆڕی میدیایی رووداوی راگەیاند: "ئەندامانی کۆنگرە خۆیان دەنگیان بەو کەسانە داوە، چونکە هەندێک لەو کەسانە کەسی زۆر بەئەزموونن، وەکو گەنجینە وان بۆ ئێمە، بۆیە ئەندامانی کۆنگرە زۆر بە ئازادانە دەنگیان دا و بە وردی ئەو کەسانەیان دیاری کرد."

عەلی باپیر بە دەنگی 892 ئەندامی کۆنگرە بووەوە کەسی یەکەمی حیزب. هاوکات ناوی پۆستەکەی لە ئەمیرەوە بۆ سەرۆکی کۆمەڵ گۆڕدرا و پاشگری ئیسلامییش لابرا و ناوەکەی کرایە کۆمەڵی دادگەریی کوردستان-عێراق.

عوسمان عەلی، ئەندامی کۆنگرەی چوارەمی کۆمەڵ گوتی: "لەسەر پێشنیازی شارەزایان بڕیارمان دا ناوی کۆمەڵ بگۆڕین. من پێشتر پێشنوێژ و وتارخوێن بووم لە مزگەوت. بەس چەند ساڵێکە چوومەتە پەرلەمان و بۆم دەرکەوتووە کە پاشگری ئیسلامی لەلای هەندێک کەس بە خراپ سەیر دەکرێت، چونکە ژمارەیەک گرووپ بە خراپ بە کاریان هێناوە. هەروەها زۆر کەسیش نەهاتووەتە ناو کۆمەڵەوە لەبەر ئەوەی ناوەکەی ئیسلامی بووە، بۆیە ئەم جارە بەم کارەمان چەند ئامانجێک دەپێکین، هەرچەندە بنەماکانی کاری ئیسلامیمان هەر وەکو خۆیان دەمێننەوە."

کامەران بابانزادە دووەم جارە دەبێتەوە بە ئەندامی ئەنجوومەنی سەرکردایەتی و دەڵێت هەوڵی تەواو دەدەن کۆمەڵی دوای کۆنگرەی چوارەم لە هەموو روویەکەوە زۆر لە کۆمەڵی رابردوو جیاواز بێت.

کامەران بابانزادە، ئەندامی ئەنجوومەنی سەرکردایەتیی کۆمەڵی دادگەریی کوردستان بە رووداوی گوت: "ژمارەیەکی زۆر خوێنی تازە هاتوونەتە ناو کۆنگرە و هەموو هەوڵمان بۆ ئەوەیە کە پەیکەر و پەیڕەوی حیزبمان بگۆڕین و گۆڕانکارییەکانیش لەبەر گەورەبوونی زیاتری کۆمەڵن و گۆڕینی ناوەکەیشی تەنیا وشەیەکی پێشنیازکراو بوو، بەڵام وشەکە بنەمای ئایینی هەیە و ئێمەیش هەوڵی دادگەری دەدەین."

کۆمەڵ لەم کۆنگرەیەدا 22 بڕگەی پەیڕەوی ناوخۆی هەموار کردوونەتەوە. ناوی ئەنجوومەنی سیاسییشی بۆ ئەنجوومەنی باڵا گۆڕیوە کە بەسەر سێ لیژنەدا دابەشبوون و هەر لیژنەیەک سێ کەسن کە لیژنەکانی بانگەواز و چاودێری و سیاسین و، سەرۆکی حیزبەکە سەرکردایەتییان دەکات.