هەڵەیەک روویدا! دووبارە هەوڵبدە
رووداو دیجیتاڵ
ناحیەی کێشەلەسەری گوڵاڵە لە سنووری دیالە بە فەرمی کرایە قەزا، بەرپرسێکی کورد لەو ناوچەیە دەڵێت "ئەو بڕیارە نادەستوورییە"، بەو پێیەی ماددەی 140ی دەستوور دەیگرێتەوە.
بڕیاری بە قەزاکردنی ناحیەی گوڵاڵە، رۆژی پێنجشەممە 19ی شوباتی 2026، بەفەرمی لەلایەن عومەر کوڕووی، سەرۆکی ئەنجوومەنی پارێزگای دیالە راگەیێنرا.
عومەر کوڕووی لە پەیامێکی ڤیدیۆییدا ئاماژەی بەوەش داوە کە ئەمڕۆ بەفەرمی گوڵاڵە کراوەتە قەزا، لە دوای ئەوەی داواکارییەکە گەیشتە بەغدا و وەزارەتی پلاندانانی فیدراڵ؛ گوتیشی: "لەپشت پەردەوە چەندین پیلانگێڕی هەبووە بۆ ئەوەی نەکرێتە قەزا."
گوڵاڵە ناحیەیەکی سەر بە قەزای خانەقین بوو، یەکێکە لەو ناوچانەی ماددەی 140ی دەستوور دەیگرێتەوە و کێشەلەسەرە، چارەنووسی کارگێڕیی لەنێوان هەرێمی کوردستان و حکومەتی فیدراڵیدا یەکلا نەبووەتەوە.
شێرکۆ تۆفیق، کارگێڕی لقی 15ی پارتی لە خانەقین بە تۆڕی میدیایی رووداوی راگەیاند: "ئەو بڕیارە نادەستووری و نایاساییە، چونکە گوڵاڵە دەکەوێتە سنووری ماددەی 140 و نابێت سنووری کارگێڕیی دەستکاری بکرێت."
لە 31ی کانوونی دووەمی 2024، ئەنجوومەنی پارێزگای دیالە دەنگی دا بۆ بەقەزاکردنی ناحیەی گوڵاڵە و لایەنە کوردستانییەکان لە دژی وەستانەوە.
شێرکۆ تۆفیق رایگەیاند، ئەو بڕیارە کاریگەریی لەسەر چارەنووسی گوڵاڵە و هەڵبژاردن دەبێت لەو ناوچەیە، کە بەگوتەی ئەو لە ساڵی 1975 زیاتر لە 75%ی دانیشتووانەکەی کورد بوون.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ