ماڵباتی 'بەرزانی قالەی خەڵووز' بۆ نێچیرڤان بارزانی: پەیامەکەتان ئازاری کۆستەکەی کەمکردینەوە

رۆژی پێنجشەممە، (20-06-2024) کەسوکار و ئەندامانی خێزانی ئەو هونەرمەندە کە شەوی 18ـی حوزەیران بەهۆی جەڵتەی دڵەوە کۆچی دواییکرد، سوپاسنامەیەک ئاراستەی نێچیرڤان بارزانی، سەرۆکی هەرێمی کوردستان دەکەن و بە "نیشانەی خەمخۆری" ناوی دەبەن.

نیاز نووری، نەقیبی سەندیکای هونەرمەندانی کوردستان شەوی 18-06-2024 بە تۆڕی میدیایی رووداوی گوت، "بەرزان بەهۆی جەڵتەی دڵ لە نەخۆشخانەی ئەنوەر شێخە کۆچی دواییکردووە".

دوای بڵاوبوونەوەی هەواڵی گیان لەدەستدانی ئەو هونەرمەندە، سەرۆکی هەرێمی کوردستان پرسەنامەیەکی ئاراستەی ماڵباتەکەی کرد و رایگەیاند: "پرسه‌ و سه‌ره‌خۆشيی قووڵم ئاراسته‌ى خانه‌وادە و هاوڕێ و هاوكارانى خوالێخۆشبوو و هونه‌رمه‌ندان و هونه‌ردۆستانی کوردستان ده‌که‌م". 

بۆ ئەو پەیامەی نێچیرڤان بارزانی، کەسوکارەکەی "بەرزانی قالەی خەڵووز" رایانگەیاند: [پەیامەکە] "ئەو هەستەی تێدا زیندوو کردینەوە کە هونەرمەندان و خەڵکانی دەستەبژێری کۆمەڵگە جێگەی بایەخی بەڕێزتانە."

لە بەشێکی دیکەی سوپاسنامەیەکەیان ئەو ماڵباتە باس لەوە دەکەن کە "بەرزان، هاوژین و باوک و برا و هاوڕێی ئێمە، تەنیا هەر موڵکی ئێمە نییە بەڵکو لە سایەی بەرنامەکانیەوە یەکێکە لە سەرمایە مەعنەوییەکانی کۆمەڵگەکەمان، کە هیوادارین بەڕێزتان بایەخی زیاتر بەوجۆرە سەرمایانە بدەن."

بەرزان قادر ناسراو بە "بەرزانی قالەی خەڵوز" لە ساڵی 1961 لە گەڕەكی كانی ئاسكانی شاری سلێمانی لەدایكبووە.

ئەو هونەرمەندە لە ساڵی 1979 چووەتە شاخ و بووەتە پێشمەرگە و لە چەندین فیلم و بەرنامەی هونەریدا بەشداری کردووە.