رووداو دیجیتاڵ
دوای ئەوەی ئەمڕۆ ئاگرێکی گەورە لە وێستگەیەکی گازی کەرکووک کەوتەوە. بەڕێوەبەری کۆمپانیای نەوتی باکوور کە وێستگەکە لە سنووری سەرپەرشتیی کۆمپانیاکەیدایە، لەبارەی رووداوەکەوە دەڵێت، هەموو شتێک ئاسایی بووەتەوە و ئاگرکەوتنەوەکە لە بۆرییەکی بچووکی وێستگەکە بووە.
رۆژی شەممە، 21ی شوباتی 2026، عامر خەلیل، بەڕێوەبەری کۆمپانیای نەوتی باکوور بە تۆڕی میدیایی رووداوی رایگەیاند، "هەموو شتێک ئێستا ئاساییە و لەنیوەڕۆوە کارکردن لە وێستگەکەدا دەستیپێکردووەتەوە. رووداوەکە هیچ زیانێکی گیانیی نەبوو، زیانە مادییەکانیشی زۆر کەمن و شایەنی باس نین." هەروەها دەشڵێت، رووداوەکە رێگر نەبووە لەبەردەم پڕۆسەی بەرهەمهێنانی گاز.
بەڕێوەبەری کۆمپانیای نەوتی باکوور ئاماژەی بەوە کرد، بەشە زیانلێکەوتووەکەی بۆرییەکە "تەنیا 4 مەتر درێژە و قەبارەی بۆرییەکەش 16 ئینجە."
ئاگرەکە کاژێر 3:20ـی بەرەبەیانی ئەمڕۆ، لە وێستگەی پەستانی گازیAB2 لە ناوچەی باجوانی پارێزگای کەرکووک کەوتەوە.
بەگوتەی عامر خەلیل، بچوکیی قەبارەی زیانەکە و بوونی پارچەی یەدەگی پێویست بۆ بۆریی 16 ئینجی، وایکرد تیمەکانی چاککردنەوە بتوانن لە ماوەیەکی کورتدا بۆرییەکە بخەنەوە کار و گواستنەوەی گاز لە نێوان وێستگەکانی AB2 و AB3 ئاسایی ببێتەوە.
دڵنیاییش دەدات لەوەی، هەموو رێکارێکیان بۆ دووبارەنەبوونەوەی رووداوی لەوشێوەیە گرتووەتەبەر.
باجوان دەکەوێتە باشووری رۆژئاوای کەرکووک لەسەر رێگەی قەزای دوبز.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ