هەڵەیەک روویدا! دووبارە هەوڵبدە
رووداو دیجیتاڵ
بەهۆی ئاڵۆزییەکانی ناوچەکە و ناسەقامگیریی دۆخی ئەمنی، بەڕێوەبەرایەتیی رۆشنبیریی زاخۆ چوارەمین فێستیڤاڵی نێودەوڵەتیی شاڵ و شەپکی بۆ کاتێکی نادیار دواخست.
دڵخواز موسا، بەڕێوەبەری رۆشنبیریی زاخۆ و سەرپەرشتیاری فێستیڤاڵەکە، بە تۆڕی میدیایی رووداوی راگەیاند، "تەواوی ئامادەکارییەکانمان بۆ ئەنجامدانی فێستیڤاڵەکە کردبوو، بەڵام بەهۆی هەستیاریی دۆخی ناوچەکە، بڕیاری دواخستنمان دا."
دڵخواز موسا ئاماژەی بەوەشدا، بەشێکی میوانەکان و گرووپە هونەرییەکان بڕیاربوو لە دەرەوەی وڵاتەوە بەشداری بکەن، بۆیە پێویست بوو دۆخەکە ئارام بێتەوە و فڕۆکەخانەکان کراوە بن بۆ ئەوەی بتوانن بە سەلامەتی بگەنە هەرێمی کوردستان.
بڕیاربوو فێستیڤاڵەکە لە 28 یان 29ـی ئەم مانگە بەڕێوەبچێت و وەک فێستیڤاڵەکانی پێشووتر، هەرچوار پارچەی کوردستان بەشداربن. دڵخواز موسا گوتیشی، "هەرکاتێک دۆخەکە جێگیر بووەوە و حکومەت رەزامەندیی نیشاندا، ئێمە تەنیا پێویستمان بە 2 هەفتەیە بۆ ئەوەی فێستیڤاڵەکە بە هەموو چالاکییەکانییەوە رێکبخەینەوە."
ئەم ساڵ چەندین گرووپی ناوخۆیی، بیانی، دەنگبێژ و فۆلکلۆری ئامادەکارییان کردبوو بۆ پێشکێشکردنی نمایشەکانیان. بڕیاربوو یەکێک لە بڕگە سەرەکییەکانی فێستیڤاڵەکە، کۆنسێرتێکی گەورەی هونەرمەند هۆزان دینۆ بێت.
فێستیڤاڵی شاڵ و شەپک لە زاخۆ بە یەکێک لە چالاکییە کولتوورییە گرنگەکان دادەنرێت، مەبەست لێی پاراستنی ناسنامەی کولتووری، جلوبەرگی رەسەنی کوردی و پەرەپێدانی کەرتی گەشتیارییە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ