رووداو - هەولێر
ئەمڕۆ لە سەرتاسەری هەرێمی کوردستان یەکەم رۆژی جەژنی قوربان بەڕێوەدەچێت، خەڵکیش لە بەرەبەیانییەکی زووەوە بەمەبەستی ئەنجامدانی نوێژی جەژن روویان لە مزگەوتەکان کرد و دوای ئەنجامدانی نوێژ، گەردن ئازاییان لەیەکدی کرد.
لە کاژێر 5:00ـی یەکەم رۆژی جەژنی قوربان (سێشەممە 21-8-2018) رووداو رووماڵی یەکەم رۆژی جەژنی قوربانی دەستپێکرد و لە سەرجەم شارەکانی باشووری کوردستان هاونیشتمانیان چوونە مزگەوتەکان و مامۆستایانی ئایینی گوتارییان لەبارەی رۆژی جەژن و لێبووردەی لەنێوان موسڵمانان پێشکەش کرد و دوایان لە خەڵکی کرد کە لەگەڵ یەکیدی تەبابن و گەردن ئازادیی لە یەکدی بکەن.
د. بەشیر خەلیل حەداد، لە مزگەوتی جەلیل خەیاتی شاری هەولێر گوتاری نوێژی جەژنی پێشکەش کرد و رایگەیاند، ئەمڕۆ رۆژی یەکدی قبووڵکردن و گەردن ئازادییە و پێویستە هەموو موسڵمانان جەژنی یەکدی پیرۆزبکەن و لێبووردەبن بەرامبەر بەیەکدی.
هاوکات نەوزاد هادی، پارێزگاری هەولێر بەشداری نوێژی جەژنی لە مزگەوتی جەلیل خەیاتی هەولێر کرد و بە تۆڕی میدیایی رووداوی راگەیاند: "پیرۆزبایی لە خەڵکی کوردستان و موسڵمانانی جیهان دەکەین، ئەمساڵیش وەک ساڵانی رابردوو پلانی تۆکمەمان بۆ رۆژانی جەژن هەیە".
پارێزگاری هەولێر گوتیشی، لە رۆژانی جەژندا زۆرێک لە رێستۆرانتەکانی هەولێر کراوە دەبن و وەک ساڵانی رابردوو نییە ئەمساڵ زۆرێک لە رێستۆرانتەکان بەڕووی گەشتیاران و خەڵکیدا کراوە دەبن.
کاروان عەلی، پەیامنێری رووداو دوای ئەنجامدانی نوێژی جەژن لە یەکێک لە مزگەوتەکان گوتی، ئەمڕۆ دوای ئەنجامدانی نوێژی جەژن خەڵكی داوای گەردن ئازادییان لەیەکدی کرد.
لە کەمپی حەسەن شام لە هەولێر بەشێک لە ئاوارەکان بەشدارییان لە نوێژی جەژنی قوربان کرد و بەگوتەی هونەر ئەحمەد پەیامنێری رووداو، ئەم جەژنە بۆ خەڵکی نێو ئەم کەمپە جیاوازە، چونکە بۆیەکەمجار رێگەیان پێدراوە خەڵک لە دەرەوەی کەمپەکە سەردانییان بکات و هەروەها رێگەشیان پێدراوە بچن سەردانی کەسوکاریان بکەن لە موسڵ.
پەیامنێری رووداو گوتیشی، رێکخراوی خێرخوازی بارزانی بەبۆنەی جەژنی قوربان جلوبەرگ بەسەر کەسوکاری ئاوارەکاندا دابەشدەکەن و ئاوارەکانیش هیوادارن دوایین جەژنی ئاوارەییان بێت.
هاوکات لە شاری سلێمانیش نوێژی جەژن بەڕێوەچوو و خەڵکی گەردن ئازادییان لەیەکدی کرد.
هەڤاڵ ئەبوبەکر، پارێزگاری سلێمانی بە تۆڕی میدیایی رووداوی راگەیاند: "ئەم جەژنە لە هەموولایەک پیرۆزدەکەین و هیوادارین ئەو جەژنە ببێتە هۆی کۆتاییهاتنی دووبەرەکی و ناکۆکی".
لەبارەی کار و چالاکییەکان و بەرنامەی پارێزگای سلێمانی بۆ هاونیشتمانیان پارێزگاری سلێمانی گوتی: "سەرجەم کارەکان بەشێوەیەکی دروست رێکخراون و رێنمایی تایبەت بە هاونیشتمانیان دراوە و داواش لە خاوەن چێشتخانەکان کراوە کە دووکانەکانیان کراوە بێت و پێشوازی لە گەشتیاران و ئەو میوانانە بکەن کە دێنە شاری سلێمانی".
پارێزگاری سلێمانی لەبارەی دەستپێکردنەوەی گەشتەکانی تورکیا بەڕووی فڕۆکەخانەی نێودەوڵەتی سلێمانی رایگەیاند، لە ئایندەیەکی نزیکدا تورکیا ئاسمانی خۆی بەڕووی فڕۆكەخانەی سلێمانیدا دەکاتەوە.
هەڤاڵ ئەبوبەکر، پارێزگاری سلێمانی بە تۆڕی میدیایی رووداوی راگەیاند: "ئەوەی بە ئێمەیان گوتووە و ئێمەش لەگەڵ دەسەڵاتی فڕۆکەوانی عێراقی قسەمانکردووە و ئەوانیش لەگەڵ تورکیا قسەیانکردووە، ئومێد هەیە لە ئایندەیەکی نزیکدا ئەم کێشەیە چارەسەربکرێت و تورکیا ئاسمانی خۆی بەڕووی فڕۆكەخانەی سلێمانیدا بکاتەوە".
پارێزگاری سلێمانی گوتی: "لە قۆناخی یەکەمدا بەلایەنی کەمەوە ئاسمانی تورکیا بەڕووی گەشتە نێودەوڵەتییەکانی فڕۆکەخانەی نێودەوڵەتی سلێمانی بکرێتەوە و لە قۆناخی دووەمدا گەشتەکانی فڕۆکەکانی تورکیا بۆ فڕۆکەخانەی نێودەوڵەتی سلێمانی بکرێتەوە".
هاوکات ئەم رۆژانە هەردوو شاری مەککە و مەدینە بەهۆی فەریزەی حەج زۆر قەرەباڵخن. بەرپرسانی سعودیە دەڵێن، زیاتر لە دوو ملیۆن کەس لە وڵاتانی جیاوازی جیهانەوە روویان لەو دوو شارە کردووە بۆ ئەنجامدانی ئەو ئەرکە ئایینییە.
فەریزەی حەج بە یەکێک لە پێنج پایەکانی ئایینی ئیسلام دادەندرێت و ئەو کەسانەش کە بواری دارایی و جەستەییان یارمەتیدەرە، لێیان داواکراوە جارێک لە ژیانیاندا ئەو فەریزەیە ئەنجام بدەن.
ئەمساڵ لە هەرێمی کوردستانەوە پێنج هەزار و 469 زیارەتکار بۆ بەجێگەیاندنی فەریزەی حەج سەردانی مەککە و مەدینەیان کردووە.
هەروەها بەبۆنەی هاتنی جەژنی قوربان رێژەی گەشتیاری لە باشووری کوردستان بەرزبووەتەوە چاوەڕوان دەکرێت بۆ جەژنی قوربان بە دەیان هەزار گەشتیار لە عێراقەوە رووبکەنە باشووری کوردستان، حکومەتی هەرێمی کوردستان ئامادەکاری کردووە بۆ پێشوازی لەو گەشتیارانە.
ئەمە لە کاتێکدایە کە ساڵانە لەگەڵ نزیکبوونەوەی جەژنی قوربان موسڵمانانی جیھان لەنێویشیاندا موسڵمانانی هەرێمی کوردستان ئاژەڵ دەکەنە قوربانی. بەگوتەی ئەو کەسانەی لەنێو بازاڕەکە کاردەکەن: ئاژەڵ لە سووریا، ئێران، جۆرجیا، ھیندستان و شوێنی دیکەشەوە هاوردەی نێو ئەم بازاڕە دەکرێن. فرۆشیارەکانیش کە ماوەیەکی زۆر ئاژەڵەکانیان بۆ ئەم کاتانە ئامادەدەکەن، ھەفتەی پێش جەژنی قوربان بە دەرفەت دەبینن بۆ فرۆشتنی ئاژەڵەکانیان.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ