مەلا بەختیار لەبارەی کۆلێژەکانی خانەقینەوە هۆشداری دەدات: دژایەتیکردنی خانەقین باجی قورس دەبێت

لە نامەکەیدا کە ئاراستەی د. لەتیف رەشید، سەرۆککۆماری عێراق؛ نێچیرڤان بارزانی، سەرۆکی هەرێمی کوردستان؛ مەسرور بارزانی، سەرۆکی حکومەتی هەرێمی کوردستان و فراکسیۆنە کوردستانییەکانی لە پەرلەمانی عێراق کردووە، مەلا بەختیار، ئەندامی پێشووی ئەنجوومەنی باڵای سیاسی و بەرژەوەندیی یەکێتیی نیشتمانیی کوردستان داوا دەکات، بە هەموولایەک "هیمەت بکەن و بەهانای کۆلێژەکانی خانەقینەوە بچن، چونکە هەڕەشەیان لەسەرە و چارەنووسی زیاتر لە 1500 خوێندکار و 150 مامۆستا و فەرمانبەری نادیارە."

مەلا بەختیار، کە ئاماژە بەوە دەکات خۆی سەرپەرشتیی بەشێکی زۆری دەستکەوتەکانی خانەقینی کردووە دوای ساڵی 2003، دەڵێت، کێشەی کۆلێژەکان بە تەنیا بە وەزارەتی خوێندنی باڵا یەکلایی ناکرێتەوە و پێویستی بە بڕیارێکی سیاسیی هاوبەشە.

مەلا بەختیار نووسیویەتی: "ئەگەر حکومەتی هەرێمی کوردستان نەتوانێ لە خانەقین و کەرکووک بەرگری لە دەستکەوتەکان بکات، ئەوا بەدڵنیاییەوە لەدەستدانی ئەم دەستکەوتانە، تێكشکانی یەکەمین سەنگەری بەرەنگاریی کوردستانە بەرامبەر بەعەرەبکردنێکی نوێ."

لە بەشێکی دیکەی نامەکەیدا، مەلا بەختیار ئاماژە بەو خزمەتگوزاری و پڕۆژە ستراتیژییانە دەکات کە لەلایەن حکومەتی هەرێمی کوردستان و یەکێتییەوە لە دوای رووخانی رژێمی بەعس لە خانەقین ئەنجامدراون، لەوانە: گەڕاندنەوەی زیاتر لە 100 هەزار کوردی دەرکراو، دامەزراندنی زیاتر لە 25 هەزار فەرمانبەر، دروستکردنی بەنداوی ئەڵوەند، کردنەوەی سێ کۆلێژ و سێ پەیمانگا، بووژاندنەوەی ژێرخانی ئاو، کارەبا، رێگەوبان و گۆڕینی ناوە تەعریبکراوەکان بۆ ناوە رەسەنە کوردییەکان.

هۆکاری "دژایەتیکردنی کۆلێژەکان لەلایەن بەغداوە" دەگەڕێنێتەوە بۆ دوو بیانوو: "گوایە ئەو زەوییەی لەسەری دروستکراون موڵکی حکومەتن، یان خانەقین ناوچەی کێشەلەسەرە". ئەو لە وەڵامدا دەڵێت: "بەدرێژایی مێژوو، حکومەتەکانی عێراق زەویی کوردستانیان داگیر و بەعەرەب کردووە. لەجیاتی ئەوەی مادەی 140 جێبەجێ بکرێ، دژی دروستکردنی کۆلێژەکانیشمانن."

بۆ سەلماندنی شایستەیی خانەقین، مەلا بەختیار ئاماری قوربانیدانەکانی شارەکەی خستووەتەڕوو، لەوانە 699 شەهید لە شۆڕشەکاندا، وێرانکردنی 167 گوند و راگواستنی دانیشتووانەکەی بۆ خوارووی عێراق.

لە کۆتایی نامەکەیدا، مەلا بەختیار هۆشدارییەکی تووند دەدات و دەڵێت: "یان دەبێ پشتیوانیی کۆلێژەکانی خانەقین بکەن، یاخود خانەقین پشت دەکاتە ئەو کەس و لایەنانەی دژایەتیی کۆلێژەکانی دەکەن. دڵنیابن دژایەتیی خانەقین، لەناو خەڵکی خانەقین، باجی قورسە."

ئەم نامەیە لە کاتێکدایە کە خوێندکارانی کۆلێژەکانی خانەقین لە مانگرتندان و داوای چارەسەرکردنی کێشەی یاسایی کۆلێژەکانیان دەکەن کە سەر بە زانکۆی گەرمیانن.

لە ماوەی 10 ساڵ، 10 هەزار و 258 خوێندکار لە زانکۆی گەرمیان دەرچوون، بەڵام بەهۆی وەستانی دامەزراندن لە کەرتی حکومی، 10 ساڵە هیچ قوتابییەک دانەمەزراوە.