پۆلیسی هەولێر: رێگە نادرێت هیچ کەس و لایەنێک هەوڵی تێکدانی ئارامی و ئاسایش بدات

میران بەکر دوێنێ شەممە بە تۆڕی میدیایی رووداوی گوت، شەوی رابردوو لە ماڵی شەهیدان، نزیک مەکتەبی سیاسیی یەکێتی لە هەولێر، لەکاتی گەڕانەوەدا "سێ ئۆتۆمبێل دەوریان گرتم و توورەکەیان کردە سەرم و ئەشکەنجەیان دام".

ئەمڕۆ یەکشەممە، 21-12-2025، پۆلیسی پارێزگای هەولێر رایگەیاند، "هاووڵاتیان دڵنیا دەکەینەوە بە هیچ جۆرێک رێگە نادرێت هیچ کەس و لایەنێک هەوڵی تێکدانی ئارامی و ئاسایش بدات و ئازادی کەسی و کەرامەتی هاووڵاتیان بە هیچ بیانوێک پێشێل بکات".

هاووڵاتیی میران بەکر عەبدوالڕەحمان کە کارمەندی وەزارەتی پێشمەرگەیە و پێشتر سکرتێری رۆژنامەوانیی بەڕێز وەزیری پێشمەرگە بووە و ئەندام و کادری یەکێتییە، درەنگانی شەوی هەینی 19ی کانوونی یەکەمی 2025 لە سنووری بارەگای مەکتەبی سیاسیی یەکێتی لەلایەن چەند چەکدارێکی خۆیانەوە دەستگیرکراوە و ئازاردراوە و دوای ماوەیەک ئازادکراوە. لە هەبوونی سکاڵای یاسایی، پۆلیس و و لایەنە پەیوەندیدارەکان رێوشوێنی لێکۆڵینەوە و رێکارەکانی پێویست دەگرنەبەر بۆ دەرخستنی راستی و سەروەرکردنی یاسا بۆ یەکلاکردنەوەی کێشەکان. 

هاووڵاتیان دڵنیا دەکەینەوە کە بە هیچ جۆرێک رێگا نادرێت هیچ کەس و لایەنێک هەوڵی تێکدانی ئارامی و ئاسایش بدات و ئازادی کەسی و کەرامەتی هاووڵاتیان بە هیچ بیانوێک پێشێل بکات.