هەڵەیەک روویدا! دووبارە هەوڵبدە
170 ماڵی ئەو گەڕەکە هەڕەشەی چۆڵکردنیان لەسەر بوو
رووداو دیجیتاڵ
بەرەبەیانە و سەربازانی سوپا بە گوشاری هێز و لێدان، خێزانێکی کورد لە گەڕەکی نەورۆزی کەرکووک دەردەکەن. پاڵ بە سەرۆکخێزانەکەوە دەنێن و دووری دەخەنەوە؛ هاوژین و منداڵەکانی ناڵە و هاواریانە و دوای دەرکردنیان، بە ناچاری دەچنە ماڵی خوشکێکی باوکیان.
سوپای عێراق بە پاساوی ئەوەی خانووەکانی نەورۆز لەسەر تاپۆی ئەوانە، ماوەماوە پەلاماری گەڕەکەکە دەدات و ئێستا 5 خانوو بە تەواوەتی دەستیان بەسەردا گیراوە.
شەوکەت رەسووڵ، دانیشتووی گەڕەکی نەورۆز، باس لەو ساتە دەکات و دەڵێت: "هاتمەوە نێو خانووەکە و دەستم بە نۆژەنکردنەوە کرد و کەرەستەم تێهێنا، من چوزانم دێنەوە سەرم؛ لە بەربانگەوە خەریکم لەگەڵیان، لێیانداوم و دەریانکردم."
ئەو هاونیشتمانییە دەڵێت: "سەرەتا ویستیان باوکم ببەنە ژوورەوە و بە هەموویان لێی بدەن، ئێمە هەرامان کرد و نەیانتوانی باوکم ببەن، دواتر خستیانە سەر زەوی و بە راکێشان بردیانە دەرەوە."
هێزێکی زۆری فیرقەی 8 و 11ـی سوپای عێراق دەستیان بەسەر چوار خانووی گەڕەکی نەورۆزدا گرتووە و گەمارۆی خانوویەکی دیکەشیان داوە. گردبوونەوە و پشتیوانیی دانیشتووانی گەڕەکەکە، گوشاری خستە سەر سوپا و دەستێوەردانی پارێزگاری کەرکووکی لێکەوتەوە.
فەرهاد عومەر، دانیشتوویەکی دیکەی گەڕەکەکەیە و دەڵێت: "ئەو تیۆرییە لامان چەسپاوە و تێگەیشتووین کە دوو کۆ دوو دەکاتە یەک؛ توانا و دەسەڵاتی ئێمە زیاترە لەوەی بیری لێ دەکەنەوە."
ئەیوب سەلاحەدین، کە گەمارۆ درابوو و ئامادە نەبوو ماڵەکەی رادەست بکات، دەڵێت: "لە کاژێر 2ـەوە ئەم ناوەیان کۆنترۆڵ کردووە، لە دەرگا دەدەن و دەڵێن: وەرنە دەرەوە و چۆڵی بکەن."
لە کاتی پاشەکشێی هێزەکانی سوپا، سەربازێک بە پۆستاڵەکەی سووکایەتیی بە کوردانی گەڕەکەکە کرد. گەرچی هێزە زۆرەکەی سوپا کشانەوە، بەڵام 170 بنەماڵەی نیشتەجێی 122 خانووی نەورۆز، هێشتا ترسیان لەو گێچەڵانە هەیە کە ماوەماوە سوپای عێراق پێیان دەکات.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ