رووداو دیجیتاڵ
بەڕێوەبەری رێگاوبان و گواستنەوەی پارێزگای سنە دەڵێت، هاتووچۆی گەشتیاران لە دەروازە سنوورییەکانی ئەم پارێزگایە بۆ هەرێمی کوردستان 30% کەمبووەتەوە.
فەرزاد حەسەنی، بەڕێوەبەری رێگاوبان و گواستنەوەی پارێزگای سنە، رۆژی شەممە رایگەیاند، لەماوەی رۆژانی نەورۆزدا لە دەروازە سنوورییەکانی باشماخ و سەیرانبەنی بانەوە 22 هەزار و 139 کەس هاتووچۆیان کردووە، کە بەراورد بە ساڵی رابردوو ژمارەکە کەمیکردووە.
لە ساڵانی رابردوو ژمارەیەکی زۆری خەڵک لە رۆژهەڵاتی کوردستان و ئێرانەوە بۆ گەشتکردن سەردانی هەرێمی کوردستانیان دەکرد، بەڵام باردۆخی ئابووریی ئێران کاریگەریی لەسەر ئەمە داناوە.
ئەم ساڵ نەورۆزیش هاوکات بووە لەگەڵ مانگی رەمەزان و لەلایەکی دیکەشەوە خەڵکی رۆژهەڵاتی کوردستان و ئێران ئێستا بۆ گەشتکردن زیاتر سەردانی تورکیا و باکووری کوردستان دەکەن و شاری وان ئامانجێکی گرنگیی گەشتیاریی ئەوانە.
فەرزاد حەسەنی گوتی، "لە بەشی گەشتەکانی نێو شار و دەرەوەی شار، گەشتکردن لە رۆژانی نەورۆزدا بەراورد بە ساڵی پار 7% کەمبووەتەوە و هاتووچۆی گەشتیاریش 12% کەمبووەتەوە."