پێشمەرگە بە چەكی قوڕسەوە بەرەو خورماتوو جوڵەی كردووە
رووداو- خورماتوو
كاژێر 23:40 خولهكی شهوی رابردوو 23-4-2016، له شارۆچكهی خورماتوو شهڕ لهنێوان چهند گهنجێكی كورد و ژمارەیەك چەكداری حەشدی شەعبی سهریههڵدایهوه، ئێستا شەڕەكە گەورە بووە و شەڕی كۆڵان بە كۆڵان سێ بەشی شارۆچكەكەی گرتووەتەوە، بەهۆیەوە دوو پێشمەرگە شەهیدبوونە، هەشت چەكداری حەشدیش كوژراون.
شەڕ لە هەڵدانی نارنجۆكێكەوە دەستیپێكرد
شهڕهكه له نارنجۆكێكی دهستییهوه دهستیپێكردووه و ژمارەیەك چەكداری حەشدی شەعبی هەڵیانداوەتە بەر دەرگەی ماڵی گۆران گهوههر (ناسراو بە گۆرەی گەوهەر) و دواتر تەقەیان لە ماڵەكەی كردووە. دوای رووداوەکە پاسهوانهكانی ناوبراو لە چەكدارە شیعەكان هاتوونەتە دەست و شەڕ دروستبووە. ئەوان حەشدی شەعبی بە دەستپێشەخەریكردن لە شەڕەكە تۆمەتبار دەكەن.
ماڵی گۆران گەوهەر دراوەتە بەر دەستڕێژی گوللە
گۆران گهوههر (ناسراو بە گۆرەی گەوهەر)
سەبارەت بە رووداوەکە گۆران گهوههر، كە سهرپهرشتی كۆمهڵێك گهنجی ئهو شارۆچكهیه دهكات به (تۆڕی میدیایی رووداو)ی راگهیاند "دوای تهقهكردن لهو كەسەی نارنجۆكەكەی بۆ ماڵی من فڕێدا، چهند چهكدارێكی دیكه دهستیان به تهقهكردن كرد و نزیكهی 45 خولهك بهردهوام بوو، دواتر هێزه ئەمنییەکان گهیشتنه نزیك شوێنی رووداوهكه".
شهڕهكه له نزیك مهڵبهندی حهمرینی یهكێتیی نیشتمانیی كوردستان بووه، شەوی رابردووی سەرچاوەیەك لە باڵی سهربازی رێكخراوی بهدر بە رووداوی گوت "ئهمه شهڕی كورد و حهشدی شهعبی نییه، بهڵكو شەڕی باڵی سهربازی یەکێک لە حیزبە شیعەکان و گۆران گهوههرە و فهرمانمان نییه و بهنیازی بهشداری كردنیش نین". بەڵام شەڕەكە گەورەبوو، ئێستا پێشمەرگە بە چەكی قوڕسەوە جوڵەی كردووە.
پێشمەرگە بە چەكی قوڕس جوڵەی كرد و حەشدی شەعبی گەمارۆداوە
هێزی پێشمەرگە بۆ پشتیوانیکردن لە چەكدارانی كوردی نێو خورماتوو جوڵەی پێكراوە و ئێستا بە چەكی قوڕسەوە چەكدارانی حەشدی شەعبییان لەنێو شارۆچكەكە گەمارۆداون، سەرجەم رێگەكانیشیان گرتوون بۆ ئەوەی هێزی پشتیوانییان لەدەرەوەی خورماتوو پێنەگات. فارووق ئەحمەد، بەڕێوەبەری ئاسایشی خورماتوو بە رووداوی گوت "پێشمەرگە بەنیازە ئەمجارە كێشەكە یەكلایی بكاتەوە".
بەڕێوەبەری ئاسایشی خورماتوو راشیگەیاند "پێشمەرگە چواردەوری خورماتووی گرتووە و هێزێكی گەورە خەریكە دێتە نێو شار، هەوڵیش بۆ نێوەندگیری هەیە، بەڵام پێشمەرگە بەنیازە ئەمجارە كێشەی خورماتوو یەكلایی بكاتەوە". هەروەها هێزە رەشەكەی سەر بە یەكەی 70-ی پێشمەرگەش خراوەتە ئامادەباشییەوە. سەبارەت بە هاتنی هێزی حەشدی شەعبیش بۆ خورماتوو، ئەو رەتیكردەوە بتوانن هێز بنێرن، چونكە پێشمەرگە سەرجەم رێگاكانی كۆنترۆڵكردوون.
هەشت چەكداری حەشدی شەعبی كوژراون دوو پێشمەرگە شەهیدبوونە
شەهید عەمید سیروان شەقڵاوەیی
بەهۆی شەڕەكە تاوەكو ئێستا هەشت چەكداری حەشدی شەعبی كوژراون و ژمارەیەكیشیان برینداربوونە، فەرماندەیەكی پێشمەرگە (عەمید سیروان شەقڵاوەیی، فەرماندە لە فەرماندەیی بەرگری و فریاكەوتن) و پێشمەرگەیەكی دیكە شەهیدبوونە، ژمارەیەك كەسی مەدەنیش برینداربوونە. هەروەها خانەوادەیەكی زۆری كورد لە خورماتوو خەریكن رادەكەن، بەوهۆیەوە رێگەی خورماتوو - كەركووك زۆر جەنجاڵ بووە، چەكدارانی حەشدی شەعبیش رێگەی خورماتوو - بەغدایان داخستووە.
مەحموود سەنگاوی: خورماتوو پڕبووە لە سیخوڕی وڵاتان
مەحموود سەنگاوی، فەرماندەی هێزی پێشمەرگە لە میحوەری گەرمەسێر و ئەندامی مەکتەبی سیاسی یەکێتیی نیشتمانیی کوردستان بە تۆڕی میدیایی رووداوی راگەیاند، بەمەبەستی لێکۆڵینەوە لە هۆکاری روودانی شەڕ لەنێوان کورد و شیعە، بە سەردانێک چووەتە نێو شارۆچکەی خورماتوو، هاوکات لەگەڵ بەرپرسە باڵاکانی ئەو سنوورەدا کۆدەبنەوە بەمەبەستی کۆتاییهێنان بەو شەڕە.
مەحموود سەنگاوی گوتیشی:" خورماتوو پڕبووە لە سیخوڕی وڵاتان و کۆمەڵە کەسانێکیش هەن لەنێو شیعەکان هەوڵی نانەوەی ئاژاوە دەدەن لەنێو کورد و شیعە، بەڵام ئێمە رێگری لەو هەوڵە دەکەین".
شەش مانگە شەڕ لە خورماتوو بەردەوامە
لە 12/11/2015 گرژی و ئاڵۆزی لەنێوان لایەنی كوردی و حەشدی شەعبی لە شارۆچكەی خوورماتوو دروستبوو، بەهۆی بەردەوامبوونی ئاڵۆزییەكان بۆ ماوەی چەند مانگێك، چەندین كەس لەهەردوولا لەگەڵ چەندین هاووڵاتی مەدەنی بوونە قوربانی، گرژییەكانیش تاوەكو ئێستا ناوبەناو بەردەوامن، تەنانەت كار گەیشتووەتە ئەوەی دیواری بەرز لەنێوان گەڕەكە كوردنشین و توركمانەكاندا دروست بكرێت، بەڵام ئەو رێگەیەش نەبووەتە هۆی بنبڕكردنی گرژی و ئاڵۆزییەكان.
شارۆچكەی خورماتوو سەر بە پارێزگای سەڵاحەدینە و نزیكەی 100 كلیۆمەتر لە سەنتەری پارێزگاكەوە دوورە، دەكەوێتە سنووری ماددەی 140، رێژەی دانیشتووانەكەی بە شارەدێ و گوندەكانیەوە نزیكەی 220 هەزار كەس دەبێت، كورد 55% ، عەرەب 15%و توركمانیش 30% شارۆچكەكە پێكدەهێنن.
.jpg)
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ