رووداو دیجیتاڵ
گوتەبێژی پۆلیسی هەولێر بە رووداوی راگەیاند، لە گەڕەکی مەنتکاوە باوکێک کوڕەکەی خۆی بە دەمانچە کوشت.
رووداوەکە کاژێر 05:00ی ئێوارەی ئەمڕۆ شەممە 24-04-2021 روویداوە. هۆگر عەزیز، گوتەبێژی پۆلیسی هەولێر بە تۆڕی میدیایی رووداوی راگەیاند "بەهۆی کێشەیەکی کۆمەڵایەتی بووە، باوکێک بەناوی (م.س) کوڕەکەی خۆی بەناوی (س.م) کوشتووە کە تەمەنی 31 ساڵە."
بەپێی زانیارییەکانی تۆڕی میدیایی رووداو، پێشتر ئەو باوکە سکاڵای یاسایی لەسەر کوڕەکەی لە بەڕێوەبەرایەتی تووندوتیژیی ئافرەتان تۆمارکردبوو.
گوتەبێژی پۆلیسی هەولێر دەشڵێت، دوای ئاگادارکردنەوەی پۆلیس، تیمی بەڕێوەبەرایەتیی نەهێشتنی تاوان گەیشتە شوێنی رووداوەکە و دەرکەوت "لەسەربانی ماڵی خۆیان، باوکەکە بە دەمانچە کوڕەکەی خۆی کوشتبوو."
ئامارى رووداوەکانى کوشتن و خۆکوشتن لە هەرێمى کوردستان روو لە هەڵکشانە، بەپێى ئەو داتایانەى تۆڕى میدیایی رووداو لە پۆلیسى پارێزگە و ئیدارەکانى وەرگرتووە، بە تەنیا سێ هەفتەى ئەم مانگە نۆ کەس کوژراون و چوار کەسیش خۆیان خنکاندووە، زۆرترین هۆکارەکانیش کێشەى کۆمەڵایەتى و زەویوزار بوون.
بەپێى بەراوردى تێکڕاى مانگانەى ساڵى رابردوو و تەنیا سێ هەفتەى مانگی نیسانی ئەمساڵ، دەردەکەوێت کە رووداوەکانى کوشتن لە کوردستان 200% زیادیکردووە و خۆکوشتنیش 25% زۆرتربووە.
.png&w=3840&q=75)
