وەزیرى کارى لوبنان: لەگەڵ عێراق لەسەر گۆڕینەوەى ئەزموون رێککەوتوین، نەک هێنانى هێزى کار

 

 

محەممەد حەیدەر، وەزیرى کارى لوبنان یەکشەممە 24ى ئابى 2025، روونکردنەوەیەکى لەبارەى  لێکتێگەیشتنێکیان لەگەڵ وەزارەتى کار و کاروبارى کۆمەڵایەتیى عێراق بڵاوکردەوە بۆ ئاڵوگۆڕى ئەزموون و شارەزایی لەنێوان هەردوو وڵات.

   

وەزیرى کارى لوبنان راگەیاند، لێکتێگەیشتنەکەیان بۆ ئاڵوگۆڕی شارەزایی و راهێنانە، نەک دامەزراندن یان دابینکردنی هەلی کار. لوبنان ئەزموونی لە بواری خزمەتگوزاری، گەشتیاری و بەڕێوەبردنی چێشتخانە و هۆتێلەکاندا دەخاتە بەردەستی عێراق، بەهۆی گرنگیی ئەم کەرتە لە بووژاندنەوەی ئابووری و رەخساندنی دەرفەتی وەبەرهێناندا وعێراقیش ئەزموونێکی زۆرى لە بەڕێوەبردن و دەرهێنانی نەوت و گازدا هەیە، کە ئەوانە ئەو بوارانەن لوبنان ئەزموونى تێدا کەمە و گەنجانى لوبنان لەسەر دەستی شارەزایانی عێراق راهێنان دەکەن و زانیاریی پێویست بۆ سوودوەرگرتن لە سامانە سرووشتییەکانیان لە داهاتوودا بەدەست دەهێنن.

 

22ى ئاب وەزیرى کارى لوبنان سەردانى عێراقى کرد و لەگەڵ ئەحمەد ئەسەدى، وەزیرى کار و کاروبارى کۆمەڵایەتى عێراق لێکتێگەیشتنێکیان واژۆ کرد لەسەر گۆڕینەوەى ئەزموون و شارەزایی لەنێوانیان. 

 

وەزیرى کارى لوبنان دەڵێت: "جێگەی داخە کە هەندێک کەس هەوڵیان دا ئەم لێکتێگەیشتنە بونیاتنەرە بشێوێنن و وێنەیەکی پێچەوانەی لێ دروست بکەن، وەک ئەوەی بریتی بێت لە دامەزراندنی عێراقییەکان لە لوبنان بەرامبەر دامەزراندنی لوبنانییەکان لە کەرتی نەوتدا. ئەم بانگەشەیە ناڕاستە، ئێمە باس لە راهێنان و ئاڵوگۆڕی شارەزایی دەکەین، نەک هێنانی هێزی کار".