رووداو دیجیتاڵ
جێگری پارێزگاری هەولێر رایدەگەیێنێت، لە رێگەی پڕۆژەکانی ئاو و کارەباوە توانیویانە نزیکەی 1000 بیری ئاو و 900 موەلیدەی گەڕەکەکان لە هەولێر لەکاربخەن، کە کاریگەریی راستەوخۆی لەسەر ژینگە و پاراستنی ئاوی ژێر زەوی هەبووە. هاوکات ئاشکرای دەکات، گرێبەستی "سیتی پاس" بۆ کەمکردنەوەی جەنجاڵی واژۆ کراوە.
مەسعود کاڕەش، جێگری پارێزگاری هەولێر لەکاتی بەشداریکردنی لە بەرنامەی (مژار)ی رادیۆی رووداو، وردەکاریی ژمارەیەک پڕۆژەی ستراتیژیی لە سێکتەرەکانی ئاو، کارەبا و رێگەوبان خستەڕوو.
داخستنی 1000 بیر
سەبارەت بە چارەسەرکردنی گرفتەکانی ئاو لە هەولێر و دەوروبەری، مەسعود کاڕەش رایگەیاند، پڕۆژەی فریاگوزاریی ئاو کێشەی بێئاوی لە ناوەندی هەولێر، بنەسڵاوە، دارەتوو، بەحرکە، عەنکاوە و قوشتەپە چارەسەر کردووە.
جێگری پارێزگاری هەولێر گوتی، "بەهۆی ئەم پڕۆژەیەوە نزیکەی 1000 بیر لە هەولێر و دەوروبەری لەکارخراون، ئەمەش دەبێتە هۆی بەرزبوونەوەی ئاستی ئاوی ژێر زەوی، کە بەهۆی وشکەساڵییەوە مەترسیی لەسەر بوو."
لەبارەی گلەیی دانیشتووانی پڕۆژەکانی وەک (مارینا 1، 2 و 3، ئەندازیاران و تەلار سیتی) کە دەڵێن ئاوی پڕۆژەی فریاگوزارییان پێنەگەیشتووە، مەسعود کاڕەش گوتی، "هەندێک گرفتی کارگێڕییە و بەهۆی نەبەستنی پێوەری ئاو بووە، دەبێت ئەو هاوبەشانە پێوەری ئاویان بۆ دابنرێت و هاوبەشی تۆمار بکەن، ئەوکات ئاویان پێدەگات."
سەبارەت بە لێڵبوونی ئاویش لە دوو هەفتەی رابردوودا، هۆکارەکەی بۆ "یەکەم باران و لێڵبوونی سەرچاوەی ئاوی زێی گەورە" گەڕاندەوە و دڵنیایی دا، کێشەکە کاتییە.
"هەولێر لە دووکەڵ پاک دەبێتەوە"
لەبارەی سێکتەری کارەباوە، کاڕەش ئاماژەی بە "سەرکەوتن"ی پڕۆژەی (رووناکی) کرد و گوتی، "لەو گەڕەکانەی بوونەتە کارەبای 24 کاژێری، هیچ موەلیدەیەکی ئەهلی نەماوە، بەمەش نزیکەی 900 بۆ 1000 موەلیدە کوژێندراونەتەوە و شار لە دەنگەدەنگ و دووکەڵ رزگاری بووە."
فراوانکردنی رێگەی کانی قرژاڵە
تەوەرێکی دیکەی قسەکانی جێگری پارێزگار، پڕۆژەی نۆژەنکردنەوەی رێگەی کانی قرژاڵە بۆ گومرگ بوو. بە گوتەی کاڕەش، بەهۆی خراپیی ژێرخانی رێگەکە، بودجەکەیان لە دوو ملیار دینارەوە بۆ نزیکەی 5 ملیار دینار زیاد کردووە، سایدی گەڕانەوەی رێگەکەش کراوە بە سێ هێڵ.
مەسعود کاڕەش شۆفێرانی ئاگادار کردەوە و گوتی، "بەم نزیکانە سایدی رۆیشتن دادەخرێت بۆ نۆژەنکردنەوە، داوا لە شۆفێران دەکەین رێگەی (رەشکین) یان رێگەی گوێڕ وەکو جێگرەوە بەکاربهێنن تاوەکو لە ماوەی دوو مانگدا پڕۆژەکە تەواو دەبێت."
لەبارەی رێگەی هەولێر - کۆیەش رایگەیاند، رێژەی کارکردن تێیدا گەیشتووەتە 30% بۆ 40%.
کێشەی زەوییە کارتەکان
سەبارەت بەو هاونیشتمانییانەی خاوەنی زەویی کارتن، مەسعود کاڕەش ئاشکرای کرد، "لە کۆی نزیکەی 140 هەزار پارچە زەویی کارت، 97%یان کراون بە تاپۆ و کێشەکەیان چارەسەر کراوە، ئەوەی دیکەش کە ماون قۆناخ بە قۆناخ چارەسەر دەکرێن."
"سیتی پاس" و ریسایکلینی ئاوەڕۆ
بۆ کەمکردنەوەی جەنجاڵی هاتووچۆ، جێگری پارێزگاری هەولێر ئاشکرای کرد، گرێبەستی پڕۆژەی "سیتی پاس" لەنێوان وەزارەتی گواستنەوە و کۆمپانیای جێبەجێکار واژۆ کراوە و ئێستا لە قۆناخی کۆکردنەوەی داتا و رووپێوی و هەڵسەنگاندندان.
هەروەها باسی لە پڕۆژەی ئاوەڕۆی قورسی هەولێر کرد و گوتی، "پڕۆژەکە بە شێوازی تۆنێلی ژێر زەوی جێبەجێ دەکرێت بۆ ئەوەی شەقامەکان نەبڕدرێن، ئاوی پیس لەبری رژانە ناو زێی گەورە، پاک دەکرێتەوە و بۆ کشتوکاڵ سوودی لێ دەبیندرێت."
لە کۆتاییدا سەبارەت بە بودجەی ساڵی 2026ـی پەرەپێدانی پارێزگاکان، مەسعود کاڕەش گوتی: "داوای نزیکەی 300 ملیار دینارمان کردووە، بەڵام پێشبینی دەکەین نزیکەی 120 ملیار دینار بۆ پارێزگای هەولێر تەرخان بکرێت."
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ