قایمقامی خانەقین: بە فەرمی داوای راگرتنی بە قەزابوونی گوڵاڵەمان کردووە

وێڕای ناڕەزایی کورد، 23ی شوباتی 2026، خالید بەتال، وەزیری پلاندانانی عێراق بە وەکالەت فەرمانێکی دەرکرد بۆ بەقەزاکردنی گوڵاڵە لە سنووری پارێزگای دیالە و ژمارەی سیمبوولی کارگێڕیی 21101ـی پێدا.

بە گوێرەی دوایین سەرژمێریی عێراق، قەزای خانەقین 127 هەزار دانیشتووی هەبوو، ناحیەی گوڵاڵە لە سنووری خانەقین 94 هەزار دانیشتوو و ناحیەی سەعدیە 40 هەزار دانیشتووی هەبوو.

جەواد فەیزوڵڵا، قایمقامی قەزای خانەقین، رۆژی پێنجشەممە، 26ـی شوباتی 2026، بە تۆڕی میدیایی رووداوی گوت: "لە جەلەولاوە نووسراویان کردووە بۆ پلاندانانی عێراق و ناحیەی سەعدیەیان لە سنووری خۆیان نووسیوە، بوون بە 134 هەزار کەس، بەگوێرەی ئەوەش دەتوانن ببنە قەزا، بەڵام من نووسراوی فەرمیم لایە بەڕێوەبەری ناحیەی سەعیدیە بە فەرمی دەڵێ نایانەوێت بچنە سەر جەلەولا".

قایمقامی خانەقین ئاماژەی بەوەکرد، ئەوان کێشەیان لە بە قەزابوونی گوڵاڵە نییە، بەڵام "ئەگەر یاسایی بێ و بە گوێرەی دەستوور بێ، مادەی 140 مان هەیە و نابێ بەهیچ شێوەیەک ناوچەکانمان لە رووی کارگێڕییەوە دەستکاری بکرێ و گۆڕانکاری تێدا بکرێت".

جەواد فەیزوڵڵا گوتی: "سەرپێچییەکی دیکە لە بڕیاری بە قەزابوونی گوڵاڵە کراوە، کە بەشێک لە ناحیەی کۆکزی خراوەتەسەر، لەکاتێکدا کۆکز ناوچەی دیالە و مادەی 140 نییە و سەر بە گەرمیانە و لە رووی کارگێڕییەوە سەر بە هەرێمی کوردستانە".

قایمقامی خانەقین گوتیشی: "بە نووسراوی فەرمی داوامان لە وەزارەتی پلاندانانی عێراق کردووە بە قەزابوونی جەلەولا رابگیرێت، [چونکە پێچەوانەی مادەی 140ـی دەستوورە".

19ی شوباتی 2026، بەقەزاکردنی گوڵاڵە لەلایەن عومەر کوڕوی، سەرۆکی ئەنجوومەنی پارێزگای دیالە راگەیێندرا.

بڕیارەکەی حکومەتی عێراق بۆ بە قەزاکردنی گوڵاڵە لەکاتێکدایە، تاوەکو ئێستا چارەنووسی کارگێڕی لەنێوان هەرێمی کوردستان و حکومەتی فیدراڵی یەکلایی نەبووەتەوە.