دهۆک 56 ساڵەی پارێزگابوونی بە کەرنەڤاڵی 'جوانی و...

گالەری

دهۆک 56 ساڵەی پارێزگابوونی بە کەرنەڤاڵی 'جوانی و خزمەت' یاد کردەوە

27-05-2025

24 Photos

بڵند تاهیر @Bilindtahir

رووداو دیجیتاڵ

پارێزگای دهۆک بە بۆنەی تێپەڕبوونی 56 ساڵ بەسەر ناساندنی وەک پارێزگای سەربەخۆ، 11ـەمین کەرنەڤاڵی ساڵانەی خۆی لەژێر دروشمی (جوانی و خزمەت) لە پارکی نەورۆزی شاری دهۆک بەڕێوەبرد.

ئەم یادە لای دهۆکییەکان نیشانەی گرنگیی مێژوویی و کولتووریی دهۆکە لە نەخشەی هەرێمی کوردستاندا.

کەرنەڤاڵەکە بە نمایشێکی هونەریی سەرنجڕاکێش لەلایەن گرووپێکی کچانی بەهرەمەندەوە دەستیپێکرد.

تابلۆ هونەرییەکە گوزارشتێکی زیندوو بوو لە رۆحی پێکەوەژیانی ئاشتیانە، فرەکولتووری و لێبووردەیی کە سیمای دیاری شاری دهۆکە و چۆن ئەم شارە بووەتە چەترێک بۆ هەموو پێکهاتەکان.

کەرنەڤاڵەکە بووە گۆڕەپانی شایی و هەڵپەڕکێ و گۆرانی و مۆسیقای رەسەنی کوردی، کە جۆش و خرۆشێکی زۆری بە ئامادەبووان بەخشی.

لە بەشێکی سەرەکی و گرنگی کەرنەڤاڵەکەدا، خەڵاتی رێزلێنان بەسەر ژمارەیەک لە کەسایەتییە باشترین و داهێنەرەکانی بوارەکانی وەرزش، ئایینی، تەندروستی، داهێنان و پەروەردەدا دابەشکرا. خەڵاتەکان لەلایەن دکتۆر عەلی تەتەر، پارێزگاری دهۆکەوە پێشکێش کران.

دهۆک لەنێو دڵی خەڵکی کوردستان و گەشتیاراندا بە "دهۆکا رەنگین" ناسراوە. ئەم ناسناوە تەنیا ئاماژە نییە بۆ سروشتە دڵگیرەکەی، بەڵکو رەنگدانەوەی توانای شارەکەیە لە لەخۆگرتنی هەموو جیاوازی و رەنگەکان، وەک چۆن تابلۆیەکی هونەریی فرەڕەنگ.