رووداو دیجیتاڵ
حکومەتی هەرێمی کوردستان هاووڵاتییان لە دوو هەژماری تۆڕە کۆمەڵایەتییەکان ئاگادار دەکاتەوە کە بە ناوی ئەوانەوە داوای پارە و کارتی مۆبایل لە خەڵک دەکەن. دەڵێت، " پەیوەندی بە ئێمەوە نییە."
وەکو حکومەت ئاشکرای کردووە، ئەو دوو کەسە بە هەردوو ناوی ساختەی "تارا کەریم ئاغا Tara Kareem Agha" و "سۆزان شێخ کەمال بەرزنجی Sozan Shex "Kamal Barznji لە تۆڕە کۆمەڵایەتییەکاندا، بەتایبەتی مەسنجەر بە شێوەیەکی ساختەکارانە بە ناوی سەرۆکایەتیی ئەنجوومەنی وەزیرانەوە، داوای پارە و کارتی مۆبایلیان لە خەڵک کردووە.
حکومەت ئاگاداری هەموو لایەکەوە، کە "ئەم کەسە ساختەکارە، دوور و نزیک هیچ پەیوەندییەكی بە ئەنجوومەنی وەزیرانەوە نییە و لایەنە دادوەری و ئەمنییە پەیوەندیدارەکانیش ئاگادار کراونەتەوە کە رێکاری یاسایی لە دژی ئەو کەسە بگرنەبەرە."
حکومەتی هەرێمی کوردستان دەشڵێت: "بە دڵنیاییشەوە ئەم ساختەکارە، دواجار باجی کارە نایاسایی و ساختەکارییەکانی دەدات و بە سزای یاسایی خۆی دەگات."
چۆنیەتیی خۆپاراستن لەو کەسانە
- ئەگەر کەسێک بەتەواوی ناسنامەی دیارنەبوو و لە تۆڕە کۆمەڵایەتییەکان نامەی بۆ ناردی، یان داوای لێکردی لینکێک بکەیتەوە، وەڵامی مەدەرەوە.
- هەمیشە دووجار بیربکەرەوە لەوەی بۆچی دەبێت داواکاریی ئەو کەسانە جێبەجێ بکەیت یان پارەیان بۆ بنێریت.
- کاتێک ئەو نامانەت پێدەگات، ئەگەر هۆشیاریی تەواوت نەبوو، راوێژ بە کەسێکی پسپۆڕ بکە.
- هەرکاتێک پەیوەندییان پێوەکردیت و داوای کۆدیان کرد کە بۆ مۆبایلەکەت هاتووە، کۆدەکەیان پێ مەدە، چونکە لەو رێگەیەوە دەکرێت هەژمارەکانت لەدەستبدەیت.