تەندروستیی ژینگەپارێزێکی خۆبەخش لە مەریوان تێکچووە و کەوتووەتە کۆماوە

ئەنجوومەنی ژینگەپارێزیی سەوزی چیا رایگەیاند، گەنجێکی خەڵکی گوندی ساوای مەریوان بەناوی رێبین گورانی، کە هەفتەی رابردوو لە کاتی کوژاندنەوەی ئاگری دارستانەکانی ناوچەی هەنجیرانی مەریوان بەهۆی هەڵمژینی زۆری دووکەڵ تەندروستیی تێکچووبوو، کەوتووەتە کۆماوە و لە نەخۆشخانەیەکی سنە خەوێندراوە.

بەپێی راگەیێندراوی ئەنجوومەنەکە، رێبین گورانی دوای تێکچوونی تەندروستیی، براوەتە نەخۆشخانەی مەریوان، بەڵام پزیشکانی نەخۆشخانەی مەریوان بە پێویستیان نەزانیوە لە نەخۆشخانە بخەوێندرێت و لەژێر چاودێریدا بێت، بۆیە رەوانەی ماڵەوەیان کردووتەوە. رۆژی سێشەممە 26-08-2025 تەندروستیی زیاتر تێکدەچێت و تووشی هەناسەتەنگی دەبێت، دواتر دەکەوێتە کۆماوە.

رێبین گورانی ئێستا لە بەشی چاودێریی چڕی نەخۆشخانەی تەوحیدی سنە خەوێندراوە؛ ئەنجوومەنی سەوزی چیا دەڵێت، تەندروستیی ناجێگیرە.

ئەنجوومەنی سەوزی چیا دەشڵێت، بەردەوام داوای لە ژینگەپارێزانی خۆبەخش کردووە بێ هاوئاهەنگی لەگەڵ ئەو ئەنجوومەنە نەچنە شوێنی سووتانی دارستانەکان، بۆئەوەی تووشی کێشە نەبن.