رووداو دیجیتاڵ
بەهۆی شەپۆلێکی بەفربارین و نزمبوونەوەی پلەی گەرما، رێگەی 50 گوند لە سنووری پارێزگای دهۆک داخراون. بەڕێوەبەری چاککردنەوە و پاراستنی رێگەوبانەکانی دهۆکیش هۆشداری دەداتە هاونیشتمانییان کە بۆ کاری زۆر پێویست نەبێت لە ماڵەکانیان دەرنەچن.
بەهۆی ئەو شەپۆلە بەفریەی ئەمڕۆ ناوچەکەی گرتووەتەوە، پلەی گەرما لە سنووری ناحیەی کانی ماسێ بۆ 6 پلە ژێر سفر دابەزیوە. بەو هۆیەشەوە رێگەی 50 گوند بە تەواوی داخراوە و هاتووچۆ لەنێوان سەنتەری دهۆک بۆ قەزای ئامێدی، ناحیەی ئەترووش لە قەزای شێخان و دهۆک بۆ ئیدارەی سەربەخۆی زاخۆ زۆر زەحمەت بووە؛ بەو هۆیەشەوە بە دەیان ئۆتۆمبێل لە رێگەکاندا گیریان خواردووە.
ئەمڕۆ دووشەممە، حازم عومەر، بەڕێوەبەری چاککردنەوە و پاراستنی رێگەوبانەکانی دەرەوەی پارێزگای دهۆک بە رووداوی راگەیاند: "رێگەکان بۆ سەرجەم گوندەکانی سنووری قەزای ئامێدی 100% داخراون. هاتووچۆ لە رێگەی دهۆک - ئامێدی و ناحیەی شێلادزێ زۆر ئەستەمە و ناتوانین بڵێین کراوەن، چونکە شەپۆلەکە بەردەوامە و پلەی گەرما زۆر دابەزیوە؛ هەر دوو کیلۆمەترێک کە رایدەماڵین، دووبارە بەفر رێگەکە دادەخاتەوە."
بەپێی گوتەی بەڕێوەبەری رێگەوبانەکانی دهۆک، ئێستا هەشت تیمی راماڵینی رێگەکان بە 50 ئامێر و 100 فەرمانبەر لە کاردان بۆ کردنەوەی رێگە سەرەکییەکان، بەڵام بەهۆی بەردەوامیی بەفرەکەوە کارەکە ئاسان نییە.
داوای لە هاونیشتمانییان کرد: "هەر کەسێک کاری زۆر پێویستی نەبێت، با لە ماڵ دەرنەچێت، چونکە هاتووچۆ لە دەرەوەی شاری دهۆک زۆر سەخت بووە."
بەپێی زانیارییەکان، لە سنووری قەزاکانی ئامێدی، شێخان و باتیفا، رێگەی نزیکەی 50 گوند بە تەواوی گیراوە. ژمارەیەکی زۆر لەو هاونیشتمانییانەی لە رێگەکاندا گیریان خواردووە، ڤیدیۆیان بۆ رووداو ناردووە و داوا دەکەن تیمەکان بە هانایانەوە بچن و رێگەکان بکەنەوە.
شەپۆلی بەفربارینەکە لە کاژێر 9:00ی بەیانیی ئەمڕۆوە سنووری پارێزگای دهۆک و ئیدارەی سەربەخۆی زاخۆی گرتووەتەوە و تاوەکو ئێستا [کاژێر 3:00ی ئێوارە] بەردەوامە.
پلەی گەرما لە زۆربەی ناوچە شاخاوییەکان نزیکەی سفرە و لە ناحیەی کانی ماسێ گەیشتووەتە 6 پلە ژێر سفر.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ