رووداو دیجیتاڵ
میدیای فەرمیی لوبنان رایگەیاند، هێرشەکانی ئیسرائیل بۆ سەر باشوور و رۆژهەڵاتی لوبنان بەردەوامن، دوای ئەوەی لە هێرشێکدا بۆ سەر باشووری وڵاتەکە 11 کەس کوژران، ئەمەش سەرەڕای بوونی ئاگربەست لە جەنگی نێوان ئیسرائیل و حیزبوڵڵادا.
وەزارەتی تەندروستیی لوبنان لە راگەیێندراوێکدا رایگەیاند، هێرشەکەی رۆژی شەممە بۆ سەر (سیر غەربییە) "بووە هۆی کۆمەڵکوژییەک کە ئاماری کۆتایی 11 کوژراو بوو، لەنێویاندا منداڵێک و شەش ژن، هەروەها نۆ بریندار، کە چواریان منداڵ و یەکێکیان ژن بوو."
رۆژی یەکشەممە 24-05-2026، ئاژانسی هەواڵی نیشتمانیی لوبنان رایگەیاند، هێرشەکانی ئیسرائیل چەندین شوێنیان لە باشوور و رۆژهەڵاتی لوبنان کردووەتە ئامانج و زیانی گیانیی لێکەوتووەتەوە.
هەندێک لە هێرشەکان پێش ئەوە هاتن، سوپای ئیسرائیل دوو هۆشداریی چۆڵکردنی دەرکرد کە زیاتر لە 10 گوندیان لە باشووری لوبنان و دۆڵی بیقاعی رۆژهەڵات دەگرتەوە.
دەزگەی بەرگریی شارستانیی لوبنان رۆژی یەکشەممە رایگەیاند، بنکەیەکیان لە شاری نەبەتیە بەهۆی هێرشێکی دوێنێ شەوی ئیسرائیلەوە وێران بووە.
حەسەن فەزڵوڵڵا، پەرلەمانتاری حیزبوڵڵا کە ئەم هەفتەیە لەلایەن ئەمریکاوە سزا درا، رۆژی یەکشەممە رایگەیاند، "گۆڕانکاریی گەورە لە ناوچەکەدا روودەدەن."
فەزڵوڵڵا گوتی، ئێران "رێککەوتنەکەی لەگەڵ ویلایەتە یەکگرتووەکان بە راگرتنی جەنگ لە لوبنان بەستووەتەوە."
رۆژی شەممە، حیزبوڵڵا رایگەیاندبوو، نەعیم قاسم، ئەمینداری گشتیی گرووپەکە پەیامێکی لە عەباس عێراقچی، وەزیری دەرەوەی ئێرانەوە پێگەیشتووە، کە تێیدا پێشنیازە نوێیەکەی ئێران جەخت لەسەر "داوای لەخۆگرتنی لوبنان" دەکات لە ئاگربەستە گشتگیرەکەدا.
فەزڵوڵڵا گوتی: "جەنگەکە تەنیا لە ئێران راناوەستێت، بەڵکو لە سەرانسەری هەموو ناوچەکەدا، بەتایبەتی لە لوبنان،" و داوای لە دەسەڵاتدارانی لوبنان کرد "سوود لەم چەترە هەرێمییە وەربگرن... کە کاریگەریی بۆ ئێمەش دەبێت."
دوای کوژرانی رێبەری باڵای ئێران لە هێرشێکی ئەمریکی-ئیسرائیلیدا، حیزبوڵڵا لە 2ـی ئاداردا لوبنانی خستە نێو جەنگەکەوە.
بەگوێرەی مەرجەکانی ئاگربەستەکە، ئیسرائیل مافی ئەوەی هەیە دژی "هێرشی پلان بۆ داڕێژراو، نزیک یان بەردەوام" هەنگاو بنێت.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ