میدیای ئێران: پزیشکیان لە هێرشێکی ئیسرائیل دا بریندار بووە

رۆژی شەممە 12ـی تەمموزی 2025، ئاژانسی هەواڵی فارس رایگەیاندووە، "لە رۆژی 16ی حوزەیران و لە سێیەم رۆژی جەنگ لەگەڵ ئیسرائیلدا مەسعود پزیشکیان، سەرۆککۆماری ئێران بریندار بووە."

بە گوێرەی هەواڵی ئاژانسەکە، سەرۆککۆماری ئێران لەو هێرشەدا بریندار بووە، کە ئیسرائیل کردییە سەر کۆبوونەوەیەکی ئەنجوومی ئاسایشی نیشتمانیی ئێران.

کۆبوونەوەی ئەنجوومەنی باڵای ئاسایشی نیشتمانیی ئێران بە ئامادەبوونی سێ سەرۆکایەتییەکە لە لە نهۆمەکانی خوارەوەی باڵەخانەیەکی رۆژئاوای تاران بەڕێوەچووە و ئیسرائیل بە 6 مووشەک هێرشیان کردووەتە سەر کۆبوونەوەکە."

فارس نیوز ئاماژەی بەوەداوە، "لە کاتی هەوڵدان بۆ دەرچوون لە شوێنی رووداوەکە قاچێکی مەسعود پزیشکیان بە سووکی بریندار بووە."

پێشتر محەممەد مەهدی تەباتەبایی، جێگری بەڕێوەبەری راگەیاندنی نووسینگەی مەسعود پزیشکیان  لە هەڤپەیڤینێکی لەگەڵ کەناڵی ئەلمەیادین رایگەیاندبوو، "ئیسرائیل هەوڵی تیرۆرکردنی سەرۆککۆماری ئێرانی داوە."

لە 13ـی حوزەیرانی 2025، ئیسرائیل هێرشی کردە سەر ئێران، دواتریش ئێران بە مووشەکی بالیستی و درۆنی بۆمبڕێژکراو وەڵامی دایەوە.

رۆژی 22ـی حوزەیران، ئەمریکا چووە نێو جەنگەکە و هێرشی کردە سەر بنکە ئەتۆمییەکانی فۆردۆ، نەتەنز و ئیسفەهان. 25ـی حوزەیرانیش، دۆناڵد ترەمپ، سەرۆکی ئەمریکا ئاگربەستی راگەیاند.