رووداو دیجیتاڵ
میدیای فەرمیی ئێران، ئەمڕۆ 27ی نیسان رایگەیاند، دەستدەکرێت بە نۆژەنکردنەوەی پاڵاوگە نەوتییەکانی پارسی باشوور کە لە جەنگی ئیسرائیل و ئەمریکا لەگەڵ ئێران، بۆردوومان کرابوون.
مووسا ئەحمەدی، سەرۆکی لیژنەی وزە لە پەرلەمانی ئێران رایگەیاند، بەڵێندەرەکان وەک بەرپرسی نۆژەنکردنەوەی پاڵاوگەکانی پارسی باشوور دەستنیشانکراون و گوتیشی: "هەموو قۆناخەکانی نۆژەنکردنەوەی ئەم پاڵاوگانە بە شارەزایی ئەندازیارە ئێرانییەکان و زانستی نێوخۆیی جێبەجێ دەکرێت."
کۆمەڵەی پاڵاوگەکانی پارسی باشوور لە پارێزگای بووشێهر و کەناراوەکانی کەنداو هەڵکەوتووە و لە 13 پاڵاوگە پێکهاتووە کە گرنگترین و گەورەترین کێڵگەی دەرهێنان و بەرهەمهێنانی گازی ئێرانە.
ئەم پاڵاوگانە ئەرکی پاککردنەوە و ئامادەکردنی ئەو گازە سروشتییەیان لە ئەستۆیە کە لە کێڵگەی هاوبەشی پارسی باشوور دەردەهێنرێت.
چەندین بەشی کۆمەڵە پاڵاوگەکانی پارسی باشوور لە 18ی ئاداری 2026 بەهۆی بۆردوومانەکانی ئەمریکا و ئیسرائیلەوە، زیانیان بەرکەوتوە.
بەگوێرەی زانیارییەکان، زیاتر لە 70٪ـی گازی بەکارهێنراوی ئێران لەم ناوچەیە دابین دەکرێ.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ