رووداو دیجیتاڵ
سەرۆکی رێکخراوی فریاکەوتنی ئێران، ئاماری قوربانییانی هێرشەکانی ئەمریکا و ئیسرائیلی ئاشکرا کرد و رایگەیاند، 214 منداڵ و مێرمنداڵ کوژراون و زیانی زۆریش بەر کەرتی تەندروستی کەوتووە.
جەعفەر میدفەر، سەرۆکی رێکخراوی فریاکەوتنی وڵات رایگەیاند، لەنێو شەهیدەکاندا 243 ژن، 214 کەسی خوار 18 ساڵ و 17 منداڵی خوار 5 ساڵ هەن.
هەروەها ئاماژەی بەوەش کرد، بچووکترین کوژراو تەمەنی 3 رۆژە و گەورەترینیان 88 ساڵە، زۆرترین کوژراویش لە پارێزگاکانی تاران، هورمزگان و کوردستانن.
سەبارەت بە بریندارەکانیش، میدفەر گوتی، "4110 ژن و 1700 کەسی خوار 18 ساڵی بریندارن."
ئاشکراشی کرد، لەنێو بریندارەکاندا منداڵی یەک مانگ و پیاوی تەمەن 100 ساڵ هەن، هەروەها زۆرترین برینداریش لە تاران، لوڕستان، ئیسفەهان، گیلان و کرماشان تۆمار کراون.
لە کەرتی تەندروستیشدا، 24 کارمەندی تەندروستی و 3 کارمەندی فریاکەوتن کوژراون، 216 کارمەندی دیکەش لە هەردوو کەرتەکەدا بریندارن.
هەروەها زیان بەر 334 ناوەندی پزیشکی، 43 ئەمبوڵانس و دوو شوێنی نیشتنەوەی هێلیکۆپتەر و فڕۆکەش کەوتووە.