رووداو دیجیتاڵ
سەرۆکی دەستەی دەروازە سنوورییەکانی عێراق دەڵێت، بەستنەوەی پۆلیسی نێودەوڵەتی (ئینتەرپول) بە سیستمی ئەسیکۆداوە، چاودێریی سەر ئۆتۆمبێلە هاوردەکراوەکان تووندتر دەکات و رێگری دەکات لە هاتنی ئەو ئۆتۆمبێلانەی لە وڵاتی سەرچاوەوە کێشەی یاساییان هەیە.
فەریق عومەر وائیلی، رۆژی چوارشەممە، 1ـی نیسانی 2026، بە تۆڕی میدیایی رووداوی راگەیاند: "پێدانی دەسەڵاتی چاودێری بە بەڕێوەبەرایەتیی پۆلیسی عەرەبی و نێودەوڵەتی (ئینتەرپول) لە نێو سیستمی ئەسیکۆدا، بە مەبەستی وردبینییە لەو ئۆتۆمبێلانەی هاوردەی وڵات دەکرێن، بۆ ئەوەی دڵنیاببنەوە لەوەی هیچ کێشەیەکی یاساییان نییە".
فەریق عومەر وائیلی گوتی: "ئەم هەنگاوە رێگری دەکات لە هاوردەکردنی ئەو ئۆتۆمبێلانەی لە وڵاتی سەرچاوەوە فەرمانی دەستبەسەرداگرتنیان بۆ دەرچووە، یان دزراون و لە تاواندا بەکارهێنراون".
سەرۆکی دەستەی دەروازە سنوورییەکانی عێراق راشیگەیاند: "ئەم رێوشوێنە زۆر گرنگە بۆ کۆنترۆڵکردنی دەروازەکان و بەدیهێنانی شەفافیەت لە مامەڵەکردن لەگەڵ وڵاتانی جیهان."
سەبارەت بە جووڵەی بازرگانی لەگەڵ تورکیا، سەرۆکی دەستەی دەروازە سنوورییەکان دڵنیایی دا هیچ پەککەوتنێک لە هاتنی کاڵاکان لە دەروازە سنوورییەکانی نێوان عێراق و تورکیا نییە.
بە گوتەی سەرۆکی دەستەی دەروازە سنوورییەکانی عێراق، پرۆسەی کارکردن لە دەروازەکان بە شێوەیەکی رێکوپێک بەڕێوەدەچێت و هاوکات وردبینی و حوکمڕانیی ئەلیکترۆنی بۆ هەموو ئەو بارهەڵگر و کاڵایانە ئەنجام دەدرێت کە دێنە نێو خاکی عێراقەوە.