رووداو دیجیتاڵ
نەینەوا لەدوای بەغدا دووەم زۆرترین کورسی و بەربژێری هەیە بۆ خولی شەشەمی پەرلەمانی عێراق، پارێزگاری نەینەوا بە رووداوی راگەیاند، "کەمترین پێشێلکاری بانگەشە لە پارێزگاکە تۆمارکراوە.
عەبدولقادر دەخیل، پارێزگاری نەینەوا بە کاوە عومەر، پەیامنێری رووداوی لە نەینەوا راگەیاند: "عێراق وڵاتێکی دیموکراسییە، پێویستە باوەڕمان بە پڕۆسەی سیاسی هەبێت، کە لە هەڵبژاردنی ئەنجوومەنی نوێنەران و ئەنجوومەنی پارێزگاکان پێکدێت."
عەبدولقادر دەخیل، پارێزگاری نەینەوا دەڵێت، "نووسینگەی نەینەوای کۆمیسیۆن ئەزموون و توانای تەکنیکی و کارگێڕی هەیە، هەروەها پاڵپشتییەکی راستەوخۆ لەلایەن حکومەتی خۆجێی هەیە، بۆ کۆمیسیۆنی هەڵبژاردنەکان لە نەینەوا."
بە بڕوای عەبدولقادر دەخیل:"نەینەوا لە هەموو شتێک و تەنانەت لە پڕۆسەی بەڕێوەبردنی هەڵبژاردنیشدا نایاب دەبێت، جا چ لە دەنگدانی تایبەت بێت یان گشتی."
لەبارەی پێشێلکارییەکانی بانگەشە لە نەینەوا، پارێزگار ئاماژەی بەوە کرد، لەسەر ئاستی سەرجەم پارێزگاکە: "سەرەڕای زۆریی حیزب و فرەیی پێکهاتەکان، نەینەوا کەمترین رێژەی پێشێلکاری تێدا تۆمار کراوە. دەتوانین بڵێین کە رکابەری لە بانگەشەی هەڵبژاردن هەیە و بەڵام ئەوەش لە سنووری خۆیدایە."
بە گوتەی پارێزگاری نەینەوا، هەموو حیزبەکان رەچاوی دۆخەکە دەکەن "لەکۆتاییدا حیزبەکان هەرچەند بن، ئەوان خەڵکی نەینەوان."
بۆ پەرلەمانی عێراق، نەینەوا 34 کورسیی گشتی و سێ کورسیی کۆتای بۆ پەرلەمانی عێراق هەیە، کە کورسییە کۆتاکان بەسەر کریستیان، ئێزدی و شەبەک دابەش بوون.
19 حیزب و هاوپەیمانی و 13 بەربژێری سەربەخۆ رکابەری لەسەر ئەو 34 کورسییەی نەینەوا دەکەن، بە کۆی گشتی 1047 بەربژێر رکابەری لەسەر کورسییەکانی بازنەی نەینەوا دەکەن.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ