رووداو دیجیتاڵ
پەرلەمانتارێکی فراکسیۆنی یەکێتیی نیشتمانیی کوردستان رایدەگەیێنێت، رۆژی دووشەممە لەتیف رەشید، سەرۆککۆماری نوێی عێراق لەگەڵ بەرهەم ساڵح، سەرۆککۆماری پێشووی عێراق دەستاودەستی دەسەڵات دەکات.
بڕیار رەشید، ئەندامی پەرلەمانی عێراق لە فراکسیۆنی یەکێتیی نیشتمانیی کوردستان بە تۆڕی میدیایی رووداوی راگەیاند، "بڕیارە رۆژی دووشەممە دەستاودەستکردنی دەسەڵات لەنێوان د. لەتیف رەشید، سەرۆککۆماری نوێی عێراق و د. بەرهەم ئەحمەد ساڵح، سەرۆککۆماری پێشووی عێراق بکرێت و د. لەتیف بە فەرمی لە کۆشکی سەلام دەستبەکار ببێت."
رۆژی پێنجشەممە 13-10-2022، پرۆسەی هەڵبژاردنی سەرۆککۆماری عێراق لە پەرلەمان بە دوو گەڕ بەڕێوەچوو؛ کێبڕکێی سەرەکی لەنێوان بەرهەم ساڵح و لەتیف رەشید-دا بوو. لە گەڕی یەکەمدا 282 پەرلەمانتار بەشداریی دانیشتنی پەرلەمانیان کرد و لەتیف رەشید 157 دەنگی بەدەستهێنا و بەرهەم ساڵح 99 دەنگی بەدەستهێنا.
لە گەڕی دووەمدا لەتیف رەشید توانیی 162 دەنگ بەدەستبهێنێت و بەسەر بەرهەم ساڵحدا سەرکەوت کە 99 دەنگی بەدەستهێنا. هاوکات 8 دەنگی پووچەڵیش هەبوو. لە گەڕی دووەمی هەڵبژاردنی سەرۆککۆماردا 269 پەرلەمانتار بەشداریی دانیشتنی پەرلەمانیان کرد. بەراورد بە گەڕی یەکەم دەنگەکانی لەتیف رەشید زیادیکرد و دەنگەکانی بەرهەم ساڵح وەکو خۆی مایەوە.
دواتر لەتیف رەشید، سەرۆککۆماری عێراق، محەممەد شیاع سوودانیی بۆ پێکهێنانی حکومەتی نوێی عێراق راسپارد.
