رووداو دیجیتاڵ
تەیف سامی، وەزیری دارایی عێراق رایگەیاند، دواکەوتنی خشتەکانی بودجەى 2025 بەهۆی ناجێگیریی نرخی نەوت و یەکلانەبوونەوەی کێشەکان بووە لەگەڵ هەرێمی کوردستان و دەڵێت، "ئامادەکردنی خشتەکانى بودجە هیچ سوودێکی نییە، لە کاتێکدا هەرێمی کوردستان بەردەوامە لە جێبەجێنەکردنی پابەندییە داراییەکانی."
ئەو گوتانەی تەیف سامی لە راگەیێندراوێکدا بوو کە ئەمڕۆ یەکشەممە، لەبارەی وردەکاریی میوانداریکردنی لەلایەن لیژنەی دارایی پەرلەمانی عێراقەوە بڵاوکرایەوە.
بەگوێرەی راگەیێندراوەکە، لەو کۆبوونەوەیەدا وەزیری دارایی باسی لە دواکەوتنی خشتەکانی بودجە کردووە و گوتوویەتی: "دواکەوتنی ناردنی خشتەکانی بودجە بۆ دوو هۆکار دەگەڕێتەوە، ناجێگیرى نرخی نەوت و یەکلایینەکردنەوەی کێشەکان لەگەڵ هەرێمی کوردستان و ئەو دۆخە رێگری لە دابینکردنی بودجەی فیدراڵی دەکات."
بە گوێرەی بڕگەی دوو لە مادەی 77ـی یاسای بودجەی عێراق، دەبوو ئەنجوومەنی وەزیرانی عێراق، تاوەکو کۆتایی ساڵی 2023 خشتەکانی بودجەی ساڵی 2024ـی رەوانەی پەرلەمان بکردایە، بۆ ئەوەی دەنگی لەسەر بدرێت.
وەزیری دارایی عێراق گوتوویەتی: "ئامادەکردنی خشتەکانی بودجە هیچ سوودێکی نییە، لەکاتێکدا هەرێمی کوردستان بەردەوامە لە جێبەجێنەکردنی پابەندییە داراییەکانی، هاوکات کاریگەریی ناجێگیریی نرخی نەوت و قەرزە کەڵەکەبووەکانیش بوونەتە رێگر لەبەردەم توانای حکومەتی فیدراڵی بۆ دابینکردنی بودجە."
بودجەی 2023ـی عێراق زیاتر لە 198 تریلیۆن دینار و بودجەی 2024 زیاتر لە 211 تریلیۆن دینار بووە. بەهۆی نەناردنی خشتەی بودجەی 2025، بڕەکەی دیار نییە، بەڵام خەرجیی عێراق لە چوار مانگی یەکەمی ئەم ساڵدا 37.6 تریلیۆن دینار بووە و داهاتەکەشی لە هەمان ماوەدا 28 تریلیۆن دینار بووە.