باڵیۆزخانەی ئەمریکا: رۆژانی 21 و 22ی مانگ کارمەندی زیاترمان عێراقیان جێهێشتووە

 

 

ئەمڕۆ یەکشەممە 22-06-2025 باڵیۆزخانەی ئەمریکا لە عێراق بڵاویکردەوە، رۆژی 12ی مانگ دەستیان بە کشانەوەیەکی رێکخراوی کارمەندەکانیان کرد، لەو چوارچێوەیەشدا رۆژانی 21 و 22ی مانگ کارمەندی زیاتر عێراقیان جێهێشت.

 

باڵیۆزخانەی ئەمریکا لە بەغدا دەڵێت، باڵیۆزخانەکەش و کۆنسووڵخانەی گشتیش لە هەولێر بە شێوەیەکی کاتی هەموو خزمەتگوزارییە ئاساییەکانی ڤیزەیان راگرتووە؛ بەڵام ئاماژە بەوەش دەکات، لە پێشکێشکردنی خزمەتگوزاری بۆ هاووڵاتییانی ئەمریکی بەردەوامن.

 

لە بەشێکی دیکەی راگەیێندراوەکەدا هاتووە، "ئەگەری زۆری تووندوتیژی یان هێرش بە ئیلهامی رێکخراوە تیرۆریستییە بیانییەکان هەیە، کە کارە بازرگانییەکانی ئەمریکا و ئەو شوێنانە بکەنە ئامانج کە هاووڵاتییانی ئەمریکی زۆر سەردانیان دەکەن. داوا لە هەموو هاووڵاتییانی ئەمریکی لە عێراق دەکەین خۆیان بەدوور بگرن لەو شوێنانەی بیانییەکان زۆر سەردانیان دەکەن، هەروەها خۆیان لە هەر کۆبوونەوە و قەرەباڵخییەکی گەورە بپارێزن."

 

 

راگەیێندراوێک لە باڵیۆزخانەی ئەمریکاوە لە بەغدا 

 

عێراق:  رۆژی 12ی حوزەیران، وەک رێکارێکی خۆپارێزی، نوێنەرایەتیی ئەمریکا لە عێراق دەستی بە کشانەوەی رێکخراوی هەندێک لە کارمەندەکانی کرد. وەک بەشێک لە هەوڵە بەردەوامەکانمان بۆ رێکخستنەوەی کارەکانمان، کارمەندی زیاتر لە رۆژانی 21 و 22ی حوزەیران عێراقیان جێهێشت. ئەم کشانەوەیە درێژەپێدەری ئەو پرۆسەیەیە لە 12ی حوزەیران دەستیپێکرد. باڵیۆزخانەی ئەمریکا لە بەغدا و کۆنسووڵخانەی گشتی لە هەولێر بەشێوەیەکی کاتی هەموو خزمەتگوزارییە ئاساییەکانی ڤیزەیان راگرتووە. هەردوو باڵیۆزخانە و کۆنسووڵخانە بەردەوامن لە پێشکێشکردنی خزمەتگوزاری بۆ هاووڵاتییانی ئەمریکی.

 

ئەگەری زۆری تووندوتیژی یان هێرش بە ئیلهامی رێکخراوە تیرۆریستییە بیانییەکان هەیە کە کارە بازرگانییەکانی ئەمریکا و ئەو شوێنانە بکەنە ئامانج هاووڵاتییانی ئەمریکی زۆر سەردانیان دەکەن. داوا لە هەموو هاووڵاتییانی ئەمریکی لە عێراق دەکەین خۆیان بەدووربگرن لەو شوێنانەی بیانییەکان زۆر سەردانیان دەکەن، هەروەها خۆیان لە هەر کۆبوونەوە و قەرەباڵخییەکی گەورە بپارێزن.

سنوورە وشکانییەکان لەگەڵ کوێت و تورکیا کراوەن.

 

هاووڵاتییانی ئەمریکی کە گەشت بۆ تورکیا دەکەن

 

ئەو هاووڵاتییە ئەمریکییانەی کە پلانیان هەیە لە رێگەی سنووری وشکانییەوە بچنە نێو تورکیا، پێویستە رێککەوتی پلان بۆ دانراو و شوێنی پەڕینەوەیان، لەگەڵ زانیارییە کەسییەکانیان (ناو، رێککەوتی لەدایکبوون، زانیاریی پاسپۆرت، دەروازەی سنووری، هەر نیگەرانییەکی پزیشکی/تەندروستی/ئەمنی) و وێنەیەکی لاپەڕەی زانیارییە کەسییەکانی پاسپۆرتەکەیان بنێرن بۆ یەکەی خزمەتگوزاریی هاووڵاتییانی ئەمریکی لە باڵیۆزخانەی ئەمریکا لە ئەنقەرە لە رێگەی ئەم ئیمەیڵەوە: Ankara-ACS@state.gov. دەروازەی سنووریی خابوور (ئیبراهیم خەلیل لە دیوی عێراق) بە شێوەیەکی ئاسایی کاردەکات. دەروازەی سنووریی ئوزوملو (سەر زێڕێ لە دیوی عێراق) لە کاژێر 8:30ـی بەیانی تاوەکو 5:30ـی ئێوارە کراوەیە.

 

هاووڵاتییانی ئەمریکی کە گەشت بۆ کوێت دەکەن

 

ئەو هاووڵاتییە ئەمریکییانەی کە پلانیان هەیە لە عێراقەوە لە رێگەی سنووری وشکانییەوە بچنە نێو کوێت، دەتوانن بەرواری پلان بۆ دانراو و شوێنی پەڕینەوەیان، لەگەڵ زانیارییە کەسییەکانیان (ناو، رێککەوتی لەدایکبوون، زانیاریی پاسپۆرت، دەروازەی سنووری، هەر نیگەرانییەکی پزیشکی/تەندروستی/ئەمنی، زانیاریی پەیوەندیکردن) و وێنەیەکی لاپەڕەی زانیارییە کەسییەکانی پاسپۆرتەکەیان بنێرن بۆ یەکەی خزمەتگوزاریی هاووڵاتییانی ئەمریکی لە باڵیۆزخانەی ئەمریکا لە کوێت لە رێگەی ئەم ئیمەیڵەوە: KuwaitACS@state.gov. پێدانی ئەم زانیارییانە رەنگە رێگە بە باڵیۆزخانە بدات لە کاتی رووداوێکی لەناکاو یان فریاگوزاریدا خێراتر یارمەتیتان بدات. پێویستە گەشتیاران پێشبینیی دواکەوتنی درێژخایەن لە دەروازە سنوورییەکان بکەن.

 

وەزارەتی دەرەوەی ئەمریکا هۆشداریی گەشتی ئاستی 4 ("گەشت مەکە") بۆ عێراق بە کاریی هێشتووەتەوە. پێویستە هاووڵاتییانی ئەمریکی بە هیچ هۆکارێک گەشت بۆ عێراق نەکەن.