رووداو دیجیتاڵ
گوتەبێژی دەسەڵاتی فڕۆکەوانیی عێراق رایگەیاند، بەهۆی رۆچوونی زەویی فڕگەی فڕۆکەخانەکە، فڕۆکەخانەی نەجەف دادەخرێت.
رۆژی هەینی، 27-10-2023، جیهاد کازم، گوتەبێژی دەسەڵاتی فڕۆکەوانیی مەدەنی عێراق بە تۆڕی میدیایی رووداوی راگەیاند: "دەمانەوێت بۆ سەرجەم گەشتیاران و ئەو کۆمپانیایانەی لە فڕۆکەخانەی نەجەف کاردەکەن رابگەیێنین، فڕۆکەخانەکە لەم ماوەیە داخراوە، بەهۆی بوونی شکان لە سەرەتای فڕگەی فڕۆکەخانەکە کە دەکەوێتە بەشی ژمارە 10 و بەدووریی 300 مەتر."
گوتەبێژی دەسەڵاتی فڕۆکەوانیی مەدەنیی عێراق گوتی: "ئەو شکانەی لە زەویی فڕگەکەدا دروستبووە بووەتە هۆی دابەزینی خۆڵی ژێر خاکەکەی، ئەوەش وایکردووە پێویست بە چاکسازی و چاککردنەوەی خێرا بکات، چاککردنەوەکەش لەپێناو پاراستنی ژیانی گەشتیاران و ئەو کەسانەیە کە فڕۆکەخانەی نەجەف بۆ گەشتکردن بەکاردەهێنن."
سەبارەت بە کاتی کردنەوەی فڕۆکەخانەکە، جیهاد کازم ئاماژەی بەوە کرد، هیچ وادەیەک بۆ چاککردنەوەی فڕگەکە دیاری ناکەن، کەی چاککرایەوە رایدەگەیێنن و دەست بە گەشتەکان دەکەنەوە.
فڕۆکەخانەی نەجەف دەکەوێتە رۆژهەڵاتی شارەکە، لە ساڵی 2008 بە فەرمی کرایەوە، لەسەر زەویی بنکەیەکی سەربازیی سەردەمی بەعس دروستکراوە، رۆژانە نزیکەی 30 گەشتی هەیە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ