رووداو دیجیتاڵ
لیوایەکی حەشدی شەعبی بە پاساوی "رێگری لە دزەکردن و جموجوڵی گرووپە چەکدارەکان"، هێز لە سنووری نێوان عێراق و سووریا بڵاو دەکاتەوە.
لیوای 27ى ئەرکی تایبەت، کە سەر بە دەستەی حەشدی شەعبییە، لە راگەیێندراوێکدا بە وێنەوە بڵاوکردنەوەی ئەو هێزەی لەسەر سنووری نێوان عێراق و سووریا لە رۆژئاوای پارێزگای ئەنبار راگەیاندووە.
ئەو لیوایەی حەشدی شەعبی ئاماژەی بەوەداوە، هێزەکە سەر بە فەوجی چواری لیواکەیانە.
لە راگەیێندراوەکەدا ئاماژە بەوەدراوە، ئەو هەنگاوەیان لە چوارچێوەی پرۆسەی تووندکردنی سنوور و رێگریکردنە لە دزەکردن و جموجوڵی ئەو چەکدارانەی بە "تیرۆریست" ناوی بردوون.
لیوای 27ى حەشدی شەعبی، سەر بە رێکخراوی بەدرە و سنووری کارکردنی لە پارێزگای سەڵاحەدینە. ئەبو محەممەد تەڵیباوی فەرماندەی لیواکەیە.
ئەو لیوایە ئاماژەی بەوەداوە، هێزەکانیان بە هاوئاهەنگی لەگەڵ هێزە ئەمنییەکانی دیکەی عێراق بۆ کۆنترۆڵکردنی سنوورەکە بڵاوکراونەتەوە.
سنوورى نێوان عێراق و سووریا زیاتر لە 605 کیلۆمەترە، پارێزگاکانى ئەنبار و نەینەوا دەگرێتەوە.