رووداو- هەولێر
گەڕەكی شێخ مەقسوودی كوردنشین لە شاری حەلەبی سووریا بۆردوومانكرا و بەو هۆیەوە دوو كەس كوژران.
چەكدارانی جەبهەت فەتحولشام و گرووپە چەكدارەكانی دیكە گەڕەكی شێخ مەقسوود-یان لە باكووری حەلەبی سووریا بۆردوومان كرد.
بەپێی زانیارییەكان بەهۆی بۆردوومانەكەوە دوو هاونیشتمانی گەڕەكەكە بە ناوەكانی "ئامینە ئەحمەد، تەمەن 42 ساڵان و ساڵح محەممەد، تەمەن 35 ساڵان" گیانیانلەدەستداوە و دوو هاونیشتمانی دیكەش بەناوەكانی "رەمزی شێخ عوسمان، تەمەن 35 ساڵان و یوسف ئەحمەد، تەمەن 41 ساڵان" برینداربوون، برینەكانیشیان قورسە.
بەپێی زانیارییەكان لە گەڕەكەكانی بوستان پاشا و چوار ریانی جەندیل، لەرێگای تۆپ و هاوەن و كاتیۆشاوە گەڕەكی شێخ مەقسوود بۆردوومان كراوە، بە ئامانجی ئەوەی رێگا لەبەردەم چوونیان بۆ نێو گەڕەكی شێخ مەقسود بكەنەوە.
لە 16-2-2016ـەوە گرووپە چەكدارەكانی سووریا هێرشی چڕیان بۆسەر ئەو گەڕەكە دەست پێكردووە، كە بەسەر گەڕەكەكانی دیكەی ژێر كۆنترۆڵی رژێمی سووریادا دەڕوانێت و شوێنێكی ستراتیژی شاری حەلەبە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ