ئەنجامی راپرسییەک دوای دەستگیرکردنی ئیمامئۆغڵۆ؛ 'دەنگی جەهەپە زیادی کردووە'

ناوەندی رۆژهەڵاتی ناوەڕاست بۆ توێژینەوەی سیاسی و راپرسییەکان (ORC) لە ئێکس ئەنجامی دوایین راپرسییەکەی بڵاوکردەوە کە تێیدا دەردەکەوێت؛ جەهەپە بە 2.1 خاڵ پێش ئاکپارتی کەوتووە.  

ناوەندەکە راپرسییەکەی لە رۆژانی 25-27ـی مانگی ئادار لەگەڵ سێ هەزار و 160 کەس لە 26 پارێزگای تورکیا و باکووری کوردستان کردووە. لە خەڵکی پرسیوە: "دەستبەسەرکردنی ئەکرەم ئیمامئۆغڵو تاوەکو چەند کاریگەریی لەسەر دەنگی دەنگدەران کردووە؟ ئەگەر یەکشەممەی داهاتوو هەڵبژاردن بکرێت، دەنگ بە کامە لایەنی سیاسی دەدەیت؟" 

وەک نەریتێکی باو لە تورکیا، سەرجەم هەڵبژاردنەکان رۆژی یەکشەممە دەکرێن. 

بەپێی راپرسییەکە؛ جەهەپە بە بەدەستهێنانی 30.2٪ـی دەنگەکان، بە جیاوازیی 2.1 خاڵ پێش ئاکپارتی کەوتووە. ئاکپارتی بە رێژەی 28.1٪ لە پلەی دووەمدایە. مەهەپە بە 8.0٪ لە پلەی سێیەمە، دەم پارتی بە 7.5٪ لە پلەی چوارەمە، پارتی زافەر بە  5.1٪ لە پلەی پێنجەمە، ئیی پارتی 5.0٪، پارتی سەرلەنوێ رەفاهـ 4.3٪ و پارتەکانی دیکەش 11.8٪ دەنگیان بەدەستهێنا. 

رۆژی 23-3-2025، کۆمپانیای سێر-ئار (SER-AR) بۆ توێژینەوەی سیاسی و راپرسییەکان، راپرسییەکی هاوشێوەی کردبوو. لە ئەنجامدا جەهەپە بە بەدەستهێنانی 33.8٪ـی دەنگەکان، بە جیاوازیی 3.6٪ خاڵ پێش ئاکپارتی کەوتبوو. ئاکپارتی بە رێژەی 30.2٪ لە پلەی دووەمدا دەهات. دەم پارتی بە  10.4٪، مەهەپە 7.5٪ و پارتی زافەر 6.4٪ لە پلەکانی سێیەم تاوەکو پێنجەم دەهاتن.