فەرماندەیەکی نوێی تورکیا بۆ سەرپەرشتی ئۆپەراسیۆنەکانی باشوور و رۆژئاوای کوردستان دەستنیشانکرا

ئەمڕۆ (شەممە، 10ـی ئابی 2024) لە رۆژنامەی فەرمیی تورکیادا، بە واژۆی رەجەب تەیب ئەردۆغان، سەرۆککۆماری تورکیا، بڕیاری پلەبەرزکردنەوە، گۆڕینی ئەرک، خانەنشینکردن و درێژکردنەوەی ئەرکەکانی فەرماندە سەربازییەکانی سوپای تورکیا بڵاوکرایەوە. 

رۆژی 1ـی ئاب، شوورای باڵای سەربازیی تورکیا کۆبوونەوەی ساڵانەی بە سەرۆکایەتیی رەجەب تەیب ئەردۆغان کرد و تێیدا پلەبەرزکردنەوە، دامەزراندن، خانەنشینکردن، درێژکردنەوەی ئەرکەکان و بابەتە پەیوەندیدارەکانی دیکە بە سوپای تورکیا، تاوتوێ کران.  

یەکێک لە بڕیارەکان؛ گۆڕینی فەرماندەی ئۆپەراسیۆنەکانی سوپای تورکیا بوو لە باشوور و رۆژئاوای کوردستان. 

لەڤەنت ئەرگون، سەرۆکی ئەرکانی هێزەکانی وشکانی بوو، کرایە فەرماندەی هێزەکانی سوپای دوو، کە سنووری چالاکییەکانی ناوچە سنوورییەکانی باکوور، باشوور و رۆژئاوای کوردستانە. 

بەمەش روکن لەڤەنت ئەرگون، دەبێتە کەسی یەکەمی ئۆپەراسیۆنەکانی سوپای تورکیا لە باشوور و رۆژئاوای کوردستان. 

بەگوێرەی ریزبەندیی ماڵپەڕی گلۆبەڵ فایەر پاوەر بۆ ساڵی 2024، سوپای تورکیا هەشتەم بەهێزترین سوپای جیهان و دووەم گەورەترین هێزی ناتۆیە. بودجەی بەرگریی سوپای تورکیا 42.3 ملیار دۆلارە.