هەڵەیەک روویدا! دووبارە هەوڵبدە
کۆنفرانسی رۆژنامەڤانیی پەروین بوڵدان.
رووداو دیجیتاڵ
شاندی دەم پارتیی ئیمراڵی دوای دیدارێکی دوو کاژێر و نیوی لەگەڵ عەبدوڵڵا ئۆجەلان، رێبەری زیندانیکراوی پەکەکە رایگەیاند، ئۆجەلان هیوای چاکبوونەوەی بۆ سرری سورەییا ئۆندەر خواستووە و جەختیکردووەتەوە، کە هیوای زۆری بە پرۆسەی ئاشتی هەیە.
پەروین بوڵدان، پەرلەمانتاری دەم پارتی و ئەندامی شاندی دەم پارتیی ئیمراڵی رایگەیاند، کە بەیانیی ئەمڕۆ دووشەممە لەگەڵ ئۆزگور ئەرۆل، پارێزەری عەبدوڵڵا ئۆجەلان سەردانی دوورگەی ئیمراڵییان کردووە و دیدارێکی "زۆر بەرهەمدار"یان لەگەڵ ئۆجەلان کردووە.
بوڵدان سەبارەت بە وردەکاریی دیدارەکە گوتی: "یەکەمین تەوەری باسەکانمان تەندروستیی سرری سورەییا ئۆندەر بوو و عەبدوڵڵا ئۆجەلان هیوای چاکبوونەوەی بۆ خواست."
پەروین بوڵدان هەروەها رایگەیاند، عەبدوڵڵا ئۆجەلان لە نزیکەوە چاودێریی تەندروستیی ئۆندەری کردووە و لە کەناڵەکانی تەلەڤیزیۆنەوە سەیری هەواڵەکانی تایبەت بە تەندروستیی ئۆندەر دەکات.
هەر ئەمڕۆ دووشەممە 21-4-2025 ئۆجەلان پەیامێکی تایبەت بە تەندروستیی سرری سورەییا ئۆندەر نووسیو،ە کە لە کۆنفرانسەکە لەلایەن پەروین بوڵدان خوێندرایەوە.
لە پەیامەکەی ئۆجەلاندا هاتووە: "هیوای چاکبوونەوە بۆ سرری سورەییا ئۆندەر دەخوازم، بەهۆی ئەو نەخۆشییەی تووشی بووە؛ هەروەها هیوای باشبوون بۆ خێزانەکەی و هەموو هاوڕێ و خۆشەویستانیشی دەخوازم".
لە بەشێکی دیکەی پەیامەکەیدا ئۆجەلان گوتوویەتی:" ئۆندەر کەسێکە رەنگدانەوەی هەوڵە گەورەکانی ئاشتییە بۆ کۆمەڵگە و دەتوانێت بە شێوەیەکی کەسی ئەو پێشبینییە خراپانە بشکێنێت کە لە کۆمەڵگەدا هەن. ئۆندەر ئەمەی کرد و پێشبینییە خراپەکانی لە کۆمەڵگە، لە پەرلەمان و شەقامەکاندا شکاند".
ئۆجەلان هەروەها بە گرنگی دەزانێت دەست بەو کولتوور و بۆچوونانەی سرری سورەییا ئۆندەر لەمەڕ ئاشتەوایی بگرن و دەڵێت:"دەبینم هەمووان دەچنە ئەو نەخۆشخانەیەی ئۆندەر لێی دەمێنێتەوە و دڵسۆزیی خۆیانی بۆ دووپات دەکەنەوە. مەرجی پابەندبوون ئەوەیە کە هەوڵی ئاشتییەکەی بخاتە واری جێبەجێکردنەوە".
عەبدوڵڵا ئۆجەلان هیوای خواستووە، ئۆندەر بە زووترین کات چاک ببێتەوە و بە جۆش و خرۆشتری زیاتر لە جاران و بەهێزی زیاترەوە بگەڕێتەوە ناویان.
کۆنفرانسەکەی شاندی دەم پارتیی ئیمراڵی لەبەردەم ئەو نەخۆشخانەیەی ئۆندەر تێیدا خەوێندراوە، کرا. پەروین بوڵدان دوای گوتەکانی هیچ پرسیارێکی وەرنەگرت و کۆتایی بە کۆنفرانسەکە هێنا.
سری سورەییا ئۆندەر، بریکاری سەرۆکی پەرلەمانی تورکیا کە هاوکات پەرلەمانتار و ئەندامی شاندی دەم پارتییە بۆ ئیمراڵی، شەوی سێشەممە، 15ـی نیسانی 2025، تەندروستیی تێکچوو و دواتر دەرکەوت تووشی پچڕانی شاخوێنبەری دڵی بووە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ