زیاتر لە هەزار کۆتر لە باخچەی ئاژەڵانی هەولێر لەنێوچوون

پێنج تاوەری کۆتر کە هێلانەی زیاتر لە 75 هەزار کۆترن لە باخچەی ئاژەڵانی هەولێر، بەهۆی "بارانبارینی زۆر"ـەوە رووخاون و زیاتر لە هەزار کۆتر لەنێوچوون و سەتان کۆتریش بریندار بوون. 

ئەندازیاری میسری سەرپەرشتی دروستکردنی تاوەرەکانیان کردووە. بەڕێوەبەری باخچەی ئاژەڵانی هەولێر دەڵێت، ئاوهەوای هەرێمی کوردستان لەگەڵ میسر جیاوازە و لە دروستکردنەوە و دیزاینی نوێ دەبێت رەچاوی کەشوهەوا بکرێت.

ئەردەڵان عومەر، سەرپەرشتیاری باخچەی ئاژەڵانی هەولێر دەڵێت، رووخانەکە بەهۆی "بارانبارینی زۆر"ـەوە بووە، تاوەرەکان چوار ساڵە دروستکراون. ساڵانەش نۆژەنکردنەوە بۆ تاوەرەکان کراوە. 

تاوەرەکان لە خۆڵ و قوڕکاری دروستکراون و ئاو چووەتە نێویانەوە، "تاوەرەکان بەنێوبانگن و تەمەنیان تاوەکو 100 ساڵ دەڕوات".

ئەشرەف ماهیر، پسپۆڕی دروستکردنی باخچەی ئاژەڵان و سەرپەرشتیاری دروستکردنی تاوەری کۆترەکان لە باخچەی ئاژەڵانی هەولێر دەڵێت، "تاوەرەکان زۆر ئاویان هەڵمژیوە و پڕئاو بوون و بەرگەیان نەگرتووە. پێشبینی بارانبارینێکی زۆر و چوار رۆژمان نەکردووە لە هەولێر. تاوەرەکان لە هەمان کەرەستە دروستدەکەینەوە، بەڵام سەرپۆشێک لەسەری زیاد دەکەین بۆ پاراستنیان".

فەرمان فازڵ، سەرۆکی رێکخراوی ئاژەڵپارێزی کوردستان، رەخنە لە "کەموکوڕی دروستکردنی تاوەرەکان" دەگرێت و دەڵێت، "تیمێکمان پێکهێنا و سەردانی باخچەکەمان کرد و بەهاوئاهەنگی ئیدارەی باخچە لەسەر هێڵین بۆ چارەسەری کۆترە بریندارەکان. ناکرێت شتێکی بەوشێوە گەورەیە دروستبکەیت و رەچاوی بارانبارین نەکەیت".