قوباد تاڵەبانی وەڵامی پرسیارە قورسەکان دەداتەوە

یەکەمین میوانی بەرنامەی ''بێستوون تۆک'' کە بەرنامەیەکی نوێی تۆڕی میدیایی رووداوە و بێستوون عوسمان پێشکێشی دەکات، قوباد تاڵەبانی، جێگری سەرۆکوەزیرانی هەرێمی کوردستان بوو، کە شەوی چوارشەممە، 24-05-2023، پەخشکرا.
 
لەکاتێکدا ئێستا لە هەرێمی کوردستان کێشەی کەمی یان نەبوونی گفتوگۆ و پێکەوەدانیشتن هەیە، بەرنامەی بێستوون تۆکی رووداو پرسیارە نەکراوەکان ئاشکرا دەکات بۆ ئەوەی نەوەی نوێ وردەکارییەکانی دۆخی کوردستان بزانێت، یەکەم ئەڵقەی بەرنامەکە، بە ئامادەبوونی قوباد تاڵەبانی پێشکێشکرا، کە قوتابیانی زانکۆی کوردستان تێیدا ئامادەبوون و راشکاوانە پرسیارەکانی خۆیان ئاراستەی جێگری سەرۆکوەزیرانی هەرێمی کوردستان کرد.

قوباد تاڵەبانی لە وەڵامی ئەوەی کە ئایا هیچ یەک لە ئامانجەکانی خۆی بەو بایکۆتە پێکا؟ گوتی، دوای گەڕانەوەی بۆ کۆبوونەوەکان توانیویانە باسی زۆر لە گرفتەکان بکەن و چارەسەر بکرێن.
 
رۆژی، 08-05-2023، دوای زیاتر لە شەش مانگ، بە هەوڵە بەردەوامەکانی سەرۆکی هەرێمی کوردستان بۆ ئاساییکردنەوەی دۆخەکە و بەهێزکردنەوەی یەکڕیزی لەنێوان هێزە سیاسییەکانی کوردستان بەگشتی و پارتی و یەکێتی بەتایبەتی، مەسرور بارزانی، سەرۆکوەزیرانی هەرێمی کوردستان و قوباد تاڵەبانی، جێگری سەرۆکوەزیران کۆبوونەوە.
 
قوباد تاڵەبانی گوتی، لە دانیشتنەکەیان لەگەڵ سەرۆکی حکومەت و ئەنجوومەنی وەزیران کە ''بۆ بەرەنگاربوونەوەی ئەو هەڕەشانەی کە روویان لە هەرێمی کوردستان کردووە و رەنگە لە داهاتووشدا روو لە هەرێمی کوردستان بکەن بوو، گەیشتینە لێکتێگەیشتن''. دەشڵێت، هیچ کام لە گرفتەکان، گرفتی کەسی نەبوون.