فیچەر - کافێی شەهرام؛ ماڵێک بۆ کوردانی تاران

لە ناوچەی دەرەکەی شاری تاران، کافێیەک هەیە بووەتە سەنتەرێکی گرنگی کۆبوونەوە و ژیانی کولتووری کورد لەو شارە. کافێی شەهرام، بە دیکۆرێکی گەرم و رەسەن، بووەتە ناوەندێکی گرنگی ناسنامەی کوردی.
شەهرام پەشابادی، کوردێکی خەڵکی سنە، بە دامەزراندنی ئەم کافێیە نزیکەی 5 ساڵ بەر لە ئێستا ژینگەیەکی تایبەتی بۆ کوردانی تاران خولقاندووە. ئەو لەگەڵ خێزانەکەی بەردەوام لەم کافێیەدا کاردەکەن.
ئەم کافێیە تەنیا شوێنێکی گەشتیاری نییە، بەڵکوو بووەتە پردێک بۆ ناساندنی کولتووری کوردی بۆ گەشتیارانی فارس و بیانی.
ئاریا ئەحمەدی، قوتابییەکی کورد لە تاران، دەڵێت "لێرە هەست بە ماڵەوە دەکەین. کافێی شەهرام بووەتە گەرمترین شوێن بۆ کوردانی تاران." کافێی شەهرام نموونەیەکی زیندووی پاراستنی ناسنامە و کولتووری کوردییە لە ناوجەرگەی تارانی پایتەختی ئێران.