فیچەر - پەرتووکخانەی پیاوێکی بەتەمەن لە موسڵ

لە گەڕەکی "سەورە" لە لای راستی شاری موسڵ، ئەحمەد محەممەد عەبدوڵڵا، لە ساڵی 1952 لە دایک بووە، پەرتووکخانەیەکی تایبەتی هەیە. ئەم پیاوە دەرچووی کۆلێژی یاسای زانکۆی بەغدادە لە ساڵی 1973 و لەوکاتەوە تا ئێستا عاشقی پەرتووک بووە.
دوای خانەنشینی، ئەحمەد تەنها خەریکی پەرتووکەکانییەتی. ئێستا زیاتر لە 12 هەزار پەرتووکی هەیە کە لە ناوەرۆکدا جۆراوجۆرن، بەتایبەت لەسەر مێژووی عێراق و بابەتە ئاینییەکان.
ئامانجی سەرەکی ئەم پیاوە پشتگیریکردنی خوێندکارانە. ئەو زۆربەی پەرتووکەکانی بەبێ بەرامبەر یان بە نرخێکی زۆر کەم (250 دیناری عێراقی) بۆ ماوەی مانگێک بە کرێ دەداتە خوێندکاران. بە بۆچوونی ئەو، کەمبوونەوەی خوێندنەوە لە ناو گەنجاندا مەترسییەکی گەورەیە بۆ سەر شاری موسڵ.
پەرتووکخانەکەی هەموو رۆژێک پڕە لە خوێندکارانی قوتابخانە و زانکۆ. ئەشرەف زاهیری، چالاکوانی مەدەنی، پشتگیری بۆ پرۆژەکەی ئەحمەد دەردەبڕێت.
هیوای ئەحمەد ئەوەیە کە لە داهاتوویەکی نزیکدا، شوێنێکی فراوانتری هەبێت تاوەکو بتوانێت بە شێوەیەکی باشتر خزمەت بە خوێندکاران بکات و پەرتووک جارێکی دیکە وەک ساڵانی پێشوو، جێگەی خۆی لەناو کۆمەڵگادا بگرێتەوە.