رۆژی هیوا جەمال: چارەنووسی منداڵە ونبووەکانی گەلی عەلی بەگ

بەغدا هەبوونی بنکەی نهێنیی ئیسرائیل لە خاکەکەی رەت دەکاتەوە، لە کاتێکدا ئیمارات بۆ یەکەمجار لە مێژوودا هێرشی سەربازی دەکاتە سەر ئێران. لەم بەرنامەیەدا، وردەکاریی گوشارە نوێیەکانی ئەمریکا بۆ سەر تاران، مەرجەکانی ئێران بۆ بەشداری لە مۆندیال، و دوایین زانیاری لەبارەی گەڕان بەدوای منداڵە ونبووەکانی گەلی عەلی بەگ دەخەینەڕوو.


گەڕان بەدوای ئادەم و مینا بە کامێرای تایبەت دەکرێت

دوای 12 رۆژ، تیمەکانی بەرگریی شارستانیی سۆران هێشتا لە گەڕان بەدوای تەرمی ئادەم و مینا لە گەلی عەلی بەگ بەردەوامن. بڕیارە ئەمڕۆ سێ کامێرای تایبەت لە هەولێرەوە بگاتە شوێنی رووداوەکە بۆ پشکنینی ئەو شوێنە قووڵانەی کە غەواسەکان ناتوانن پێی بگەن. لە رووداوی وەرگەڕانی ئۆتۆمبێلێکدا، سێ منداڵ کەوتنە ناو ئاوەکە و تاوەکو ئێستا تەنیا تەرمی لاوەند دۆزراوەتەوە.

تەندروستیی جیهانی: ڤایرۆسی هانتا مەترسی نییە بۆ سەر حاجیان

رێکخراوی تەندروستیی جیهانی دڵنیایی دەدات کە هیچ مەترسییەکی بڵاوبوونەوەی ڤایرۆسی هانتا لە وەرزی حەجی ئەمساڵدا نییە، بەرپرسێکی رێکخراوەکە رایگەیاند، ئەم ڤایرۆسە لە رێگەی مشک و قرتێنەرەکانەوە دەگوازرێتەوە نەک لە مرۆڤەوە بۆ مرۆڤ، و لە بنەڕەتدا لە رۆژهەڵاتی نێوەڕاست زۆر دەگمەنە.

تای خوێنبەربوون لە عێراق تەشەنە دەکات

وەزارەتی تەندروستیی عێراق هۆشداری دەدات لەبارەی زیادبوونی حاڵەتەکانی تووشبوون بە تای خوێنبەربوون. تەنیا لە هەفتەی رابردوودا 15 تووشبووی نوێ و حاڵەتێکی گیانلەدەستدان تۆمار کراون. لە سەرەتای ئەمساڵەوە 48 کەس لە سەرتاسەری عێراق تووشبوون و 4 کەسیان گیانیان لەدەستداوە.

دەست بە دابەشکردنی پارەی گەنمی جووتیاران کرا

بەڕێوەبەرایەتیی گشتیی بازرگانیی هەرێمی کوردستان رایگەیاند، پڕۆسەی دابەشکردنی وەجبەی پێنجەمی شایستە داراییەکانی گەنمی جووتیاران لە هەولێر و دهۆک دەستیپێکردووە و چاوەڕوان دەکرێت تا کۆتایی هەفتە پارەی جووتیارانی سلێمانی و هەڵەبجەش دابەش بکرێت.

بەغدا و تاران بۆ کۆنترۆڵکردنی سنوورەکان کۆبوونەوە

لێژنەی باڵای ئەمنیی نێوان عێراق و ئێران لە بەغدا کۆبوونەوە و جەختیان لە بەهێزکردنی هاوئاهەنگییەکان بۆ چاودێریکردنی سنوورەکان و رێگریکردن لە جووڵەی گرووپە چەکدارەکان کردەوە.

بڕیاری نوێ بۆ دامەزراندنی دەرچووانی پزیشکی لە عێراق

نووسینگەی سەرۆکوەزیرانی عێراق فەرمانی کردووە بە دەستپێکردنی رێکارەکانی دامەزراندنی یەکەمەکانی کۆمەڵەی پزیشکی بۆ ساڵی 2024. هەروەها وەزارەتی دارایی راسپێردراوە کە لە کاتی ئامادەکردنی بودجەدا، دۆسیەی دامەزراندنی دەرچووانی پیشە پزیشکی، تەندروستی و پەرستارییەکان لەبەرچاو بگرێت.

سوودانی فەرمانی پلەبەرزکردنەوەی بۆ هێزە ئەمنییەکان دەرکرد

محەممەد شیاع سوودانی، فەرماندەی گشتیی هێزە چەکدارەکانی عێراق، بڕیاری پلەبەرزکردنەوە و پێشخستنی خزمەتی بۆ ئەفسەران و کارمەندانی وەزارەتەکانی بەرگری، ناوخۆ، حەشدی شەعبی و دەزگای دژەتیرۆر دەرکرد. بەپێی بڕیارەکە، ئەفسەران 6 مانگ پێشخستنی خزمەت وەردەگرن و پلەدارەکانیش یەک پلەی سەربازیی بەرزتر یان 2 ساڵ پێشخستنیان بۆ هەژمار دەکرێت.

چیرۆکی خوێندن بە کوردی؛ لە ژێرزەمینەوە بۆ زانکۆ

زمانی کوردی لە رۆژئاوای کوردستان رێگەیەکی دوور و درێژی بڕیوە؛ لە خوێندنی نهێنی لە ژێرزەمینەکان لە سەردەمی رژێمی بەعسەوە، تاوەکو بوون بە زمانی فەرمیی خوێندن لە قوتابخانە و زانکۆکان. دوای ساڵی 2015، پرۆگرامی خوێندن گۆڕا و سیستەمێکی نوێ داڕێژرا کە تێیدا منداڵان بە زمانی دایکی خۆیان دەخوێنن.

ڤیان ئامارا؛ ئەو ژنەی گیانی فیدای زمانی کوردی کرد

ڤیان ئامارا، یەکێکە لە سیمبولە دیارەکانی وانەی زمانی کوردی لە رۆژئاوای کوردستان. ئەو رۆڵێکی بنەڕەتیی هەبوو لە دامەزراندنی سیستەمی پەروەردەی کوردی و پێگەیاندنی سەدان مامۆستا. ڤیان باوەڕی وابوو "زمان، جەستە و رۆحی نەتەوەیە" و بۆ پاراستنی، گوند بە گوند دەگەڕا تا قوتابخانەی کوردی بکاتەوە. 


واشنتن: ئێران بە دراوی دیجیتاڵ خۆی لە سزا دەدزێتەوە

وەزارەتی گەنجینەی ئەمریکا هۆشداریی داوەتە بانک و دامەزراوە داراییەکان کە سوپای پاسداران رێگەی نوێی بۆ گواستنەوەی پارە و خۆدزینەوە لە سزاکان دۆزیوەتەوە. بەگوێرەی واشنتن، تاران لە رێگەی کۆمپانیای وەهمی و دراوە دیجیتاڵییەکانەوە ساڵانە بە بەهای ملیاران دۆلار دەگوازێتەوە بۆ کڕینی پێداویستیی سەربازی. 

بۆ یەکەمجار؛ ئیمارات هێرشی سەربازیی کردە سەر ئێران

بەپێی زانیارییەکانی رۆژنامەی وۆڵ ستریت جۆرناڵ، فڕۆکە جەنگییەکانی ئیمارات هێرشیان کردووەتە سەر پاڵاوگەیەکی نەوت لە دوورگەی لاڤانی ئێران و بۆ ماوەی چەندین مانگ لەکاریان خستووە. 


هاوژینی سەرۆکی ئیتڵاعات: 6 جار هەوڵی کوشتنی هاوژینەکەم دراوە

هاوژینی مەجید خادمی، سەرۆکی ئیتڵاعاتی سوپای پاسداران، ئاشکرای کرد کە لە دوای دەستپێکردنی شەڕەوە، 6 جار هەوڵی کوشتنی هاوژینەکەی دراوە و دوو جار بریندار بووە. ئەو دەڵێت لە یەکێک لە هەوڵەکاندا، دوژمن بۆ دڵنیابوون لە کوشتنی، لە یەک کاتدا و لە ماوەی تەنیا 2 چرکەدا، 3 شوێنی جیاوازی بۆردوومان کردووە کە گومانیان هەبووە خادمی لە یەکێکیاندا بێت.

سوپای پاسداران بۆ هەموو فەرماندەیەک جێگر دادەنێت

جێگری یاریدەدەری هاوئاهەنگیی سوپای پاسداران رایگەیاند، بۆ پاراستنی بەردەوامیی فەرماندەیی، بۆ هەموو پلە و پۆستێک فەرماندەی یەدەگیان داناوە. عەلی فەزلی دەڵێت، ئەمە ئەزموونێکی کۆنی سەردەمی شەڕی ئێران و عێراقە و ئێستا هەر فەرماندەیەک بکوژرێت، راستەوخۆ کەسێکی دیکە شوێنی دەگرێتەوە.

بەرپرسی بەرگریی ئێران لە کاتی هێرشەکەدا خەوتبوو

غولامڕەزا جەلیلی، سەرۆکی سیستمی بەرگریی ناچالاکی ئێران، دانی بەوەدا نا کە کاژێر 3ـی بەرەبەیان کاتێک ئیسرائیل هێرشی کردە سەر ئێران، ئەو لە ماڵەوە خەوتبوو و بە دەنگی تەقینەوەکان بەخەبەر هاتووە. ئەم دانپێدانانە رەخنەی زۆری بەدوای خۆیدا هێناوە.

پەڵەیەکی گەورەی نەوت لە نزیک دوورگەی خارگ دەرکەوت

وێنەی مانگە دەستکردەکان پەڵەیەکی گەورەی نەوتیان بە رووبەری 51 میلی چوارگۆشە لە نزیک دوورگەی خارگی ئێران تۆمار کردووە. نیویۆرک تایمز پێی وایە رەنگە ئەمە بەهۆی گوشارەکانی ئەمریکاوە بێت کە وایکردووە ئێران بە ناچاری بەشێک لە نەوتەکەی بڕژێنێتە دەریاوە.

ترەمپ: ئاگربەستی نێوان واشنتن و تاران لە لێواری رووخانە 

دۆناڵد ترەمپ، سەرۆکی ئەمریکا، رایگەیاند ئاگربەستی نێوان واشنتن و تاران لە لێواری رووخانە و وەڵامەکەی ئێرانی بە "بێبایەخ" وەسف کرد. لە بەرامبەردا، تاران هەڕەشەی وەڵامدانەوە دەکات و 5 مەرجی بۆ گەڕانەوە بۆ گفتوگۆکان داناوە.

واشنتن نەخشەی نوێ لە لوبنان دادەڕێژێت

ئەمریکا گوشار دەکات بۆ دەستپێکردنی گەڕێکی نوێی دانوستاندنی راستەوخۆ لەنێوان لوبنان و ئیسرائیل، کە تێیدا نەک تەنیا کێشەی سنوورەکان، بەڵکو پرسی چەکی حیزبوڵڵا و داهاتووی پەیوەندییەکانیش یەکلا بکرێتەوە.

ئێران بۆ بەشداری لە مۆندیال 10 مەرجی هەیە

فیدراسیۆنی تۆپی پێی ئێران 10 مەرجی بۆ بەشداریکردن لە مۆندیالی 2026 خستووەتە بەردەم فیفا. گرنگترین مەرج، پێدانی ڤیزایە بە هەموو ئەندامانی شاندەکەیان، بەتایبەت ئەو کەسانەی لە سوپای پاسداران خزمەتیان کردووە.

فەرماندەیەکی دیکەی دیار لە هێزەکانی حەمیدەتی جیا بووەوە

عەمید عەلی رزقوڵڵا، ناسراو بە "سافاننا"، کە یەکێکە لە فەرماندە مەیدانییە دیارەکانی هێزەکانی پشتیوانیی خێرا لە سوودان، جیابوونەوەی خۆی لەو هێزانە راگەیاند. سافاننا رایگەیاندووە کە دەیەوێت لەگەڵ "ئیرادەی گەلی سوودان" بێت و چیتر بەشێک نەبێت لە شەڕ. 

پوتین بە ئۆتۆمبێلی تایبەتی خۆی پێشوازی لە مامۆستاکەی دەکات

لە گرتەیەکی ڤیدیۆیی دەگمەندا، ڤلادیمیر پوتین، سەرۆکی رووسیا، دەردەکەوێت کە خۆی شۆفێری بۆ مامۆستایەکی دێرینی دەکات و دەیبات بۆ میواندارییەکی نانی ئێوارە لە کۆشکی کرێملن. ئەم دیمەنە وەک پەیامێکی مرۆیی و رێزگرتن لە پێگەی مامۆستا، لە میدیاکانی جیهاندا دەنگدانەوەی بەرفراوانی هەبووە.

نامەیەکی جێفری ئێپستاین پێش خۆکوشتنی بڵاوکرایەوە

دادوەرێکی ئەمریکی نامەیەکی بڵاوکردەوە کە دەگوترێت جێفری ئێپستاین، ملیاردێری تۆمەتبار بە کاری دەستدرێژی سێکسی بۆ سەر کچان و منداڵان، پێش خۆکوشتنی نووسیویەتی. لە نامەکەدا هاتووە: "بۆ ماوەی چەندین مانگ لێکۆڵینەوەیان لەگەڵ کردم و هیچیان دەستنەکەوت." بڵاوبوونەوەی ئەم نامەیە دوای چەندین ساڵ، گومانەکانی دەربارەی چۆنیەتیی مردنی ئێپستاین لە زینداندا جارێکی دیکە وروژاندووە.



رۆژی هیوا جەمال

شۆیەکی 50 خولەکییە هەموو بەیانییەک کاژێر 08:00 بەشێوەی زیندوو پێشکێش دەکرێت. تێیدا گفتوگۆی پڕ زانیاری لەگەڵ کەسانێک دەکرێ کە مەرج نییە لەنێو هەواڵەکاندا ناسراوبن، بەڵام مژارەکانیان زۆر گرنگن. هەوڵدەدرێ لە رێگەی چیرۆکە کەسییەکانەوە باشتر و ئاسانتر زانیاری بگەیێندرێتە خەڵک.

لە ماوەی بەرنامەکەدا هەوڵدەدرێ وەرگر بەشی تەواوی رۆژەکە بەرچاوڕوونیی هەبێ سەبارەت بەو شتانەی لە کوردستان و ناوچەکە و جیهانیش روودەدەن. هەموو بەیانییەکیش هیوا جەمال راستی و ناڕاستیی زانیارییەک ئاشکرا دەکات کە لەنێو خەڵک دا بڵاوبوونەتەوە. 

دیوێکی جیاوازی دیکەی ئەم شۆیە، گەنگەشەی پێشکێشکارە لەنێو خەڵک و لەسەر شەقام لەسەر ئەو مژارانەی رای گشتییان بەخۆیەوە سەرقاڵ کردووە. 

ئامانجی شۆیەکە ئەوەیە وەرگری کوردستانی لە هەواڵی ساختە (فەیک نیوز) دووربخاتەوە. وابکات هەمیشە بۆ زانینی ئەوەی بڕیار وایە بەدرێژایی رۆژ و رۆژانی دواتر رووبدات بگەڕێتەوە بۆ (رۆژی هیوا جەمال).