جەمیل هەورامی: بافڵ تاڵەبانی و عومەر شێخ مووس سەردانی سەرکردە ناڕازییەکانی یەکێتی دەکەن

سەرۆکی کۆمەڵەی پێشمەرگە دێرینەکان دەڵێت، لیژنەیەک بە سەرپەرشتیی بافڵ تاڵەبانی، سەرۆکی یەکێتی و عومەر شێخ مووس، یەکێک لە دامەزرێنەرانی یەکێتیی نیشتمانیی کوردستان پێکهێندراوە بۆ سەردانی سەرکردە و تیکۆشەرە دێرین و ناڕازییەکانی یەکێتی و، داوایان لێدەکرێت بگەڕێنەوە ناو ئۆرگانەکانی حیزبەکە و کار بکەن.

 

جەمیل هەورامی، سەرۆکی کۆمەڵەی پێشمەرگە دێرینەکان کە هاوکات فەرماندەیەکی سەربازیی یەکێتیی نیشتمانیی کوردستانە و سەرۆکی لیژنەی پێشمەرگە بوو لە کۆنگرەی پێنجەمی ئەو حیزبەدا، لە بەرنامەی رووداوی ئەمڕۆ، کە نوێنەر فاتیح پێشکێشی دەکات، گوتی، "لیژنەیەک لە یەکێتیدا دروست کراوە تاوەکو سەردانی هەموو ئەو سەرکردە و تێکۆشەرە دێرینانە بکات کە ئێستا نیگەرانن و بەشداریی کۆنگرەی پێنجەمی حیزبەکەیان نەکرد."

 

گوتیشی، لیژنەکە بافڵ تاڵەبانی، سەرۆکی یەکێتی و عومەر شێخ مووس، ئەندامی دەستەی دامەزرێنەری حیزبەکە سەرپەرشتیی دەکەن و سەردانی هەموو سەرکردە ناڕازییەکان دەکەن، گوێ لە نیگەرانییەکانیان دەگرن و هەوڵ دەدەن قایلیان بکەن تاوەکو بگەڕێنەوە بۆ کارکردن لەناو ئۆرگانەکاندا، بەڵام ناتوانن ببنە ئەندامی مەکتەبی سیاسی، چونکە ئەندامانی مەکتەبی سیاسی دەبێت لەو ئەندامانە بن کە لە کۆنگرەدا دەرچوون بۆ سەرکردایەتی.