ئێوارەی 30/12/2014 پەرلەمانتارێك میوانی بەرنامەی "رووداوی ئەمڕۆ" بوو لە كەناڵی رووداو. منیش گوێم بۆ شلكردبوو بزانم ئەو پەرلەمانتارە چۆن وەڵامی پرسیارەكانی پێشكەشكارەكە دەداتەوە و بەرنامەی چییە بۆ چارەسەری برینە گانگرینییەكانی ئەم وڵاتە.
بەڵام زۆر جێگەی سەرسوڕمان بوو لەلام، راستتر وایە بڵێم تووشی شۆك بووم، كاتێك بینیم پەرلەمانتارەكە مووچەی خۆی بەراورد دەكرد لەگەڵ مووچەی پێشكەشكارەكە و دەیگوت "من كە سەرۆكی 24 پەرلەمانتارم بە پلەی وەزیر، مووچەكەم كەمترە لە هی تۆ كە كارمەندی تەلەڤزیۆنێكیت".
هەرچەندە سەرەتای هەفتە پێشكەشكاری بەرنامەكە ئاشكرای كرد كە مووچەكەی 3000 دۆلاری ئەمریكییە. بەڵام بەلای منەوە مووچەكەی هەرچەندێك بێت، هیچ گرنگ نییە. ئەوەی كە پێویستە قسەی لەسەر بكرێت تێكەڵكردنی ئەم گفتوگۆ سەیر و سەمەرەیەی نێو بەرنامەكەیە لەگەڵ ئەركی راستەقینەی پەرلەمان.
پێش هەموو شتێك لە سەرتاپای جیهاندا سیستمی مووچە لە كەرتی تایبەت سەربەخۆیە و پەیوەندی بە سیستمی مووچەی كەرتی گشتییەوە نییە. لە هەموو كۆمپانیاكانیش ئاستی مووچە بەرزترە لە مووچەی كارمەندانی حكومی.
ئەگەر بابەتەكە رەخنەگرتن بێت لە فەندكردنی كەناڵەكانی راگەیاندن لەسەر بودجەی گشتی، ئەوە تا بڵێی لەجێی خۆیەتی و راستە. رێگرتن لێشی ئەركی پەرلەمانە كە بڕیار لەسەر یاسای بودجەی ساڵانە دەدات. دەتوانێ نەهێڵێ هیچ دەزگایەكی میدیایی بە حیزبی و ئەهلییەوە لە پارەی حكومەت بەش بەرێت.
بەڵام ئەگەر لەدەرەوەی ئەوە بێت، تۆمەتباركردن و هەوڵدان بۆ ناوزڕاندنی خەڵك بە هۆی بڕی مووچەكەی كە لە كۆمپانیایەكی ئەهلی وەردەگرێت، نەك تەنها ئەركی كەس نییە، بەڵكو پێچەوانەی یاسا گەردوونی و بنەما ئیتیكییەكانە.
وا بزانم ئەم وڵاتە كێشەی گەورەتری هەیە لە مووچەی میدیاكارێك. وەك بڵێیت كوردستان نەبێت مەترسی تیرۆری لەسەرە، یان ئێمە نەبین كە هێشتا خاوەنی هێزێكی بەرگری نیشتیمانی نین! وەك بڵێی كوردستان نەبێت كە بە دەست گەندەڵی و بۆشایی ئیدارییەوە دەناڵێنێ! باشتر نییە پەرلەمان سەرقاڵی چارەسەری ئەو كێشانە بێت؟
ئەگەر لە من دەپرسن، نەبوونی دەستوور، كەموكوڕیی یاساكان، هەیمەنەی حیزب بەسەر حكومەتەوە، بەربادی سیستمی خزمەتگوزاری تەندروستی و پەروەردە، هەموو كێشەی زۆر زۆر گەورەترن كە پێویست دەكات پەرلەمان خەمیان لێبخوات.
دەبێت ئیدی دەست بكەین بە بنیادنانی ژێرخانێكی ئابووری بۆ ئەم وڵاتە، ئامانجمان دامەزراندنی كارگە و رێكخستنەوەی سیستمی باج و دەرامەت بێت، نەك هەتا هەتایە شەڕ لەسەر شێوازی دابەشكردنی داهاتی نەوت بكەین.
دەبێت پەرلەمان سەرقاڵی ئەم بابەتانە بێت، نەك رۆژەڤی ژمارە یەكی كڕین یان نەكڕینی ئۆتۆمبیل بێت بۆ پەرلەمانتاران.
رام وایە ئەگەر ئەم 111 نوێنەرەی گەل بتوانن بەڕاستی هەندێك لەو كێشانەی باسمكرد چارەسەر بكەن، نەك دەردی خۆیان دەڵێن "وەنەوشە" با گرانبەهاترین ئۆتۆمبێلیان بۆ بكڕن.
بەڵام ئەگەر تازە بە تازە لایەنی ریفۆرمخواز، كەمكردنەوەی خەرجییەكانی پەرلەمان بە ئینجاز بزانێت، دەبێت هەموو ئەندام پەرلەمانان دەست بخەنە سەر ویژدانی خۆیان و جارێكی دیكە بیر بكەنەوە لەوەی تا چەندێك توانیویانە ئەو دروشمە بریقەدارانە جێبەجێبكەن كە دەیان و سەدان هەزار دەنگیان پێهێنا.
ئەگەر ئەم پەرلەمانە بیتوانیایە بە تێپەڕاندنی یاسایەك بۆ خزمەتی سەربازی سوپای یەكگرتووی كوردستانی دروستبكات و هێزی پێشمەرگە یەكبخات، ئەوكات هەموو سەرمان بۆ دادەنەواند. ئەگەر ریفۆرمێكی جۆری لە سیستمی ئابووریی وڵاتدا بكردایە ناوی دەچووە نێو مێژووەوە.
بەڵام هەتا ئێستا تەنها كارێكی گرنگ كە كردوویەتی پێكهێنانی دەستەی باڵای سەربەخۆی هەڵبژاردن و راپرسی بووە كە ئەویش بە شێوەیەك كرا هەتا ئێستا سەرۆكی هەرێم واژۆی نەكردووە. یاسای بودجەی حیزبەكانیش هیچ نەبوو جگە لە رازیكردنی دڵی ئەو لایەنانەی بەخۆیان دەگوت ئۆپۆزسیۆن.
حەق وایە پەرلەمانتاران ببینن كە خەڵك دەنگی داوە بەوان و دوای تەواوبوونی خولی پەرلەمانییان هەر بە پارەی خەڵك مووچەی خانەنشینی وەردەگرن. ئەدی حەقی خۆی نییە بیرێك لە كێشە راستەقینەكانی ئەو گەلە بكەنەوە؟ بیرێك لە ئایندەی ئەو گەلە بكەنەوە؟
پەرلەمان ئەو دەزگایەیە كە میللەت چاوەڕێی ئەوەی لێ دەكات كار بۆ پرۆژەی سەربەخۆیی بكات و كاتێك ئەو پرۆژەیە گەیشتە بەرهەم خودی پەرلەمان بێت كە بڕیارەكەی دەدات. نەك مووچەی میدیاكارێكی بەلاوە گرنگتربێت لەو سەربەخۆییە.
زۆر دڵم خۆشە كە ئەو هەڵەیەم نەكرد دەنگ بە كەستان بدەم. ئێستاش داوای هیچتان لێ ناكەم، چونكە دەزانم لەم وڵاتەدا ئومێدی سەربەخۆیی و ریفۆرم و بەرزكردنەوەی كوالیتی ژیان و هەموو مافەكانی مرۆڤ جارێكی دیكە دەكرێنەوە قوربانی چەلەحانێی - "مووچەكەی تۆ زۆرترە" – "نەوەڵا وەنەوشەكەی تۆ گرانترە".
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ