بەپێچەوانەی هەموو ئەوانەوە کە بەهۆی ئەو قەیرانە سیاسییەی لە کوردستان دروستبووە رەشبینن، من گەشبینم. گەشبینییەکەشم لە سادەییم نییە، بەڵکو لەبەرئەوەیە کە دەزانم کوردستان توانای تێپەڕاندنی ئەو قەیرانەشی هەیە، وەکچۆن قەیرانە گەورەترەکانی دیکەی تێپەڕاند.
ئەوەی کە دوو سەرەکیترین سەرکردەکانی باشووری کوردستان متمانەیان بەیەکدی نەماوە ئاساییە. چونکە زۆرجار ئەوە روویداوە و متمانە دروستبووەتەوە، بەڵام گرنگ ئەوەیە هەوڵی هەمووان بەو ئاراستەیەدا بێت کە پێکەوە نەیگەیەننە مریشکەڕەشە.
کاک مەسعوود و کاک نەوشیروان دوو رەمزی گرنگی قۆناخی خەباتی رزگاریی نیشتمانین. ئەو قۆناخەی هێشتاش بەردەوامیی هەیە، رۆژێک مەیدانی تەختە و رۆژێکی دیکە پڕ هەوراز و نشێوە.
ئەو دوو پیاوە لە شەستەکانی سەدەی رابردووەوە سەر بە دوو قوتابخانە و تێگەیشتنی جیاواز لە شێوازی گەیشتنە رزگاریی نیشتمانی بوون، بەڵام هەردووکیان، هەرچەندە پێناسەی جیاوازیشیان بۆی هەبووبێت، بڕوایان بەوە هەبووە کە وێستگەی کۆتاییان یەکە.
باشترە ئاوڕ لە رابردووی دوور نەدەینەوە و باسی ئەوە نەکەین کە ئەو جیاوازیی بیرکردنەوە و قوتابخانەیە چ ماڵوێرانییەکی بۆ کورد لە باشووری کوردستان هێنا.
چاکترە باسی ئەو قۆناخانە بکەین کە بەهۆی یەکدەنگی و لێکتێگەیشتنی هەردوولا چۆن بەرەی کوردستانی دروست بوو و بۆ راپەڕینەکەی ساڵی 1991 کورد یەکدەست و یەک بڕیار بوون.
هەروەها با باسی ئەو قۆناخە بکەین کە لەدوای 2003ەوە بەهۆی نزیکبوونەوەی ئەو دوو بیرکردنەوە و قوتابخانەیەوە کورد چۆن مافەکانی خۆی، ئەگەر بەشێوەی سیمبۆلیکیش بێت، لە دەستوور و سیستمی سیاسیی دەوڵەتی عێراقدا چەسپاند. بەدواشیدا با ئەوە وەبیر هەمووان بهێنینەوە کە لە شەڕی دژی داعشدا، یەکدەنگی و یەکهەڵوێستیی هەمان ئەو کەسانە بوو کە وایکرد بە ساڵێک نێوبانگ و توانای سیاسی و سەربازیی کوردستان بازی گەورە بدات.
شەڕی داعش و پێشتریش شەڕی بەغدا، بەسەریشیەوە گەندەڵی، تەحەمولکردنیان بۆ خەڵکی کوردستان سەخت بوون، بەڵام هەمیشە ئەوەی ورەی دەدایە هەمووان ئەوەبوو کە هەموومان پێکەوە لە یەک کەشتیداین و ئەگەر گەیشتینە کەناراو پێکەوەین و ئەگەر خنکاشین پێکەوە دەخنکێین.
لەدوای 23ی حوزەیرانەوە ئەو ورەبەرزی و هەستکردن بە یەکچارەنووسییە، جێگەی بەتاڵکردووە بۆ نائومێدییەکی قووڵ.
ئەو خەڵكەی دڕندەیی داعش و گوشارەکانی بەغدا چۆکی پێدانەدا، ناکۆکیی سیاسیی نێوان سەرکردەکان ورەی رووخاند.
ئەو گەنجانەی لەمڕۆژانەدا بەرەو ئەوروپا هەڵدێن، هەموویان یەک شت دووبارەدەکەنەوە: "بۆ ئەوروپا ناچین، بەڵکو لە کوردستان هەڵدێین"! ئەو گەنجانە بە هەق نازانم، بەڵام لێیان تێدەگەم ئەگەر بڕوایان بەوە نەمابێت کە حیزبەکانی کوردستان دەتوانن بگۆڕێن.
کەواتە بۆچی گەشبینم؟ لەبەرئەوەی خراپترین رەوش دەهێنمە پێشچاوی خۆم. دەزانم هەرچەندە هەڕەشەش بکەن، حیزبەکانی کوردستان بەتەمای براکوژییەکی نوێ نین.
چونکە باش دەزانن کە نە دەتوانن بیکەن و نە قازانجیشی تێدادەکەن. ئەگەر هات و تاوەکو 20/8/2015 ئەوەی ناوی لێنراوە "سازان" نەکرا، ئەوکات بژارەی دیکە دێنەپێشەوە، کە هەموویان سیاسین. جا ئەگەر پێمانوابێت ئەوکات دووئیدارەیی لە کوردستان دروستدەبێتەوە، هەڵەین.
چونکە دووئیدارەیی خۆی هەیە و هەندێک هەنگاو نراون بۆ یەکخستنەوەی ئیدارەکان. بە نەسازان ئەو هەوڵانە خاوتر دەبنەوە و کاتی زۆرترمان پێویست دەبێت بۆئەوەی دیسان بگەڕێینەوە ئەو خاڵەی ئێستا تێیداین.
تاوەکو دەگەینەوە ئێرەش وزە و هێزی مرۆیی زۆرمان لەدەستدەچێت و رەنگە ئەو هەلەی ئێستا لەپێشمانە تاوەکو ئەوکات وەک هەلەکانی مێژووییەکانی دیکەمان بە هەڵە لەدەست بچن.
بۆیە رێگەی راست ئەوەیە کە ئەگەر تەنانەت بەبێ گۆڕانیش قەیرانی سیاسیی هەرێمی کوردستان چارەسەرکرا، کەس هانی ئەوە نەدات رەمزەکانی خەباتی رزگاریی نیشتمانیمان پێکەوە بیگەیەننە مریشکەڕەشە. چونکە مادام هەموومان لە یەک کەشتیداین، دەبێ کاپتنی کەشتییەکەمان یاریدەدەری شارەزا و بەئەزموونی وای لەگەڵ بمێننەوە کە چانسی نقوومبوونی لە هەر کاتێک کەمتر بکاتەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ