بۆ تێگەیشتنی ورد لە جووڵەی هەندێک لە کارەکتەرە سیاسییەکان، کۆسرەت رەسول وەک نموونەیەکی گەورەی قۆناخەکانی سیاسەتکردن.
سرووشتی ناکامڵی پارتە سیاسییەکان لە هەرێمی کوردستان، لە روانگەی رووبەڕووبوونەوەی دەنگی تووڕە و ناڕەزایی خەڵک، کێشەی راسیزم و ناوچەگەرێتی و ئاستی هۆشیاری سیاسی و کۆمەڵایەتی کارەکتەرە سیاسییەکان و خەڵک، هەمیشە پارتە سیاسییەکانی لەنێو کۆنفلێکتی سارددا هێشتووەتەوە.
سرووشتی یەکێتی لەدوای نەخۆشکەوتنی مام جەلال بەتایبەتی چووە قۆناخێکی دیکەوە، کە یەکێتی خۆشی لێی ناڕازییە، دۆست و نەیارەکان بەهەمانشێوە بە جووڵەی ئێستای یەکێتی هێندە ئاسوودە نین.
جووڵەی کۆسرەت رەسول لە هەوڵدان بۆ شکاندنی بەستەڵەکی سیاسی و رەوینەوەی تەمی نامتمانەیی، تادێت بەشێوەی جیاواز و کارێزماییتر دەردەکەوێت، لە ئیدامەدان بە هەنگاوەکان و درێژکردنەوەی پەیوەندییەکان لەگەڵ پارتە سیاسییەکان و نەرمینواندن لە هەندێک خاڵی چارەنووسازی نێوخۆ و دەرەوەی یەکێتی، بەشێکە لە نهێنییەکانی ئەو کارێزمایی بوونە.
کۆسرەت رەسول دەیەوێت مێژووی قوربانییەکانی خۆی و یەکێتی و گەلەکەی نەکەوێتە ژێر پرسیار و مەترسی زیاترەوە. خۆ لە سیاسەتکردندا هەموو کەسێک کەم تا زۆر کاریگەرییەکی بەردەکەوێت، بەڵام هەرگیز یارییە سیاسییەکان موڵکی هەموو کارەکتەرێک نین، تا لە گۆڕەپانی سیاسەتدا یاری و جووڵەی نادروست بکەن.
نەزانین لە سیاسەت وەک یاریکردن بە ئاگرە و هەروەک رمێکی دوو سەرە، گەر نەیبڕی، بێگومان دەتبڕێ، مەرج نییە هەموو وڵات خەریکی کاری سیاسی بێت، ئاخر هەرگیز نابێت کیسنجەر رووبکاتە سینەما و شێخ سمایلیش سیاسەت.
تەرکیز لە سەرکردەیەک بکەینەوە، کەوا چۆن سەرکردە کاریگەری لەسەر کۆمەڵگە جێدەهێڵێت. جووڵەکانی دوێنێ و بەتایبەتی ئێستای کۆسرەت رەسول لەگەڵ پارتی، مامەڵەکردنێکی سیاسیانە و راستگۆیانەیە، چونکە وەک تێبینی دەکرێت، بەڕای کۆسرەت رەسول لە دەرگاوە بچینە ژوورەکان نەوەک لە پەنجەرەکانەوە، گەلەکەمان چیدی بەرگەی موماتەلە و تەڵەکەبازی و مەد و جەزرکردن ناگرێت، بۆیە سیاسەتی کۆسرەت رەسول لە هەموو خاڵەکان حەکیمانە دەبیندرێت.
رەنگە لێرە و لەوێ ناتێگەیشتن و پەلاماری کوێرانە هەبووبێت، بەڵام لە دواجاردا ئەزموون دەریدەخات و مێژوو تۆماری دەکات، ئەگەر کۆسرەت رەسول بەمشێوەیە مامەڵە نەکات، وڵات لە لێواری نغرۆبوون نزیک دەبێتەوە، کە ئەو دەیەوێت بەهەر نرخێک بێت بەلەمی ئەزموونەکەمان بەسەلامەتی بگاتە کەنار و بەسەرکەوتوویی لەنگەر بگرێت.
بۆیە ئێستا کۆسرەت رەسول هەم بۆ پارتی نهێنییەکی گرنگی پەیوەندییە سیاسییەکان و راگرتنی باڵانسی پێکەوەییە، لەهەمانکاتدا بۆ خودی یەکێتی کلیلێکی گەورەی رابەرایەتیکردنە، بۆیە لەنێوخۆدا دەبێتە مەرجەع و لە ئاستی ناوچەیی و نێودەوڵەتیشدا دەبێتە سەرچاوەی راوێژپێکردن و بەهەندوەرگرتنی، کەواتە لۆژیکیانە لەو نهێنییانە بڕوانین و فام بکەین، کۆسرەت رەسول بۆ سەربەخۆیی، بۆ چاککردنی بژێوی خەڵک و گەڕانەوەی ژیانی خەڵک، بۆ دۆخی ئاسایی و دروستکردنی متمانەی سیاسی کارێزمایەکی قۆناخەکە و سەرچاوەیەکی گەورەی چارەسەرییەکان دەبێت، ئەم گەورەییانە، گەورەیی گەورەکان دەپارێزێ، نەوەک لە بەهایان کەمبکاتەوە!
بەشداریکردنی کۆسرەت رەسول وەک کارەکتەرێکی بەهێز لە گۆڕەپانی سیاسی لە هەرێمی کوردستان و ناوچەکە، هاوکێشە و ئاراستەکانی گشتپرسی لە ئەگەری مەرگی گشتپرسی بۆ گیان بە بەرداکردنی گشتپرسی گۆڕی. کۆسرەت رەسول سیاسییانە هەم مێژوو و یەکێتیی نیشتمانیی کوردستانی پاراست، هەم باڵانسی نێوان هێزە سیاسییەکانی لە تووڕەیی و ناکۆکییەوە بۆ سرووشتێکی دیموکراسی گۆڕی.
لە هەنگاوە نیشتمانی و دیبلۆماسی و سیاسییەکانی کۆسرەت رەسول لە گشتپرسیدا:-
- دوورکەوتنەوەی کورد لە ئەگەری دووئیدارەیی.
- دوورخستنەوەی کورد لە روودانی شەڕی نێوخۆ.
- سوربوونێکی دیکە و نوێبوونەوەیەکی دیکە، کەوا بەڵێ کەرکووک کوردستانییە، هەروەها جارێکی دیکە دەمکوتکردنی نەیارانی کەرکووک .
- ناردنی دەیان نامە کەوا سیاسەت کاری سیاسییەکانە.
- ئیسپاتکرنی یەکێتی کەوا "لە ئاشتیدا کۆتری سپی و شنەی باین، لە شەڕیشدا پڵنگین و رەشەباین".
- رووسوورکردنی یەکێتی و خودی کەسایەتی خۆی کە لە پرسە نیشتمانی و نەتەوەیییەکاندا نەوەک هەر دژ نییە، نەوەک هەر بینەر نییە، بەڵکو هاوڕێبەر و خولقێنەر و دەمڕاست و پاڵپشتی راستەقینەیە.
- سەلماندی کە کارەکتەر و سەرکردەی هەموو رۆژگار و قۆناخەکانە.
- کۆسرەت رەسول لە گشتپرسی ئایندەی یەکێتی رۆشنکرد و یەکێتی جگە لە نیشتمان بە هیچ بابەتێکی دیکە نەبەستەوە.
- گفتوگۆ و دیالۆگی کردە هەوێنی برایەتی و تەبایی، نەوەک خۆشکردنی ئاگری دووبەرەکی و بەرد خستنە دەستی خەڵک.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ