رووداو - هەولێر
محەممەد كەریم، چیرۆكنووس و رۆماننووس، نوێترین رۆمانی خۆی بەناونیشانی (دێو بەهمەن) چاپ و بڵاوكردەوە كە تیشك دەخاتە سەر رۆژانی شەڕی ناوخۆیی كوردستان.
محەممەد كەریم، بە (ئەدەب و كولتوور)ـی رووداوی راگەیاند: "رۆمانەكە باس لە زامە قووڵەكانی شەڕی ناوخۆ و ناڵە و هاواری قوربانییەكانی ئەو جەنگە ماڵوێرانكەرە دەكات. گوزارشت لەو ساتەوەختە ناخۆشە دەكات كاتێ بە كەسێك دەگوترێت چەند كاژێرێكی دیكە گوللەباران دەكرێی، لەكاتێكدا هیچ تاوانێكی نەكردووە. مرۆڤ لە ساتێكی وەها ناسك و ئاڵۆزدا هەست بەچی دەكات؟ ئایا تەسلیمی مەرگێكی ناوەختە دەبێت یان بەرگریی دەكات و خۆی بە دەزوولەی هیوادا هەڵدەواسێ؟".
هەروەها دەڵێت "رۆمانەكە بە ساتێكی پڕ لە ئازار دەستپێدەكات. وردە وردە رووداوەكان گەشە دەكەن و پەل دەهاوێن بۆ رووداوی دیكە و خوێنەر دەخەنە دڵەڕاوكێیەكی سەیرەوە كە دەستی لەسەر دڵیەتی و بە شەوقەوە دوای رووداوەكان دەكەوێ و چاوەڕێ دەكات بزانێ چارەنووسی دێو بەهمەن چی دەبێت".
ئەم رۆمانە چوارەمین كتێبی محەممەد كەریمە، پێشتریش كۆمەڵە چیرۆكی (خەونی سپی)، رۆمانی (من هەمیشە نیگەرانم)، هەروەها كۆمەڵە چیرۆكی (وەرزی دروێنەی فریشتەكان)ی نووسیوە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ