ئیدارەی بایدن رێکارەکانی فرۆشتنی چەک تووندتر دەکات

شەوی پێنجشەممە، 31-8-2023، وەزارەتی دادی ئەمریکا لە راگەێیندراوێکیدا رێکارە نوێیەکانی ئیدارەی بایدنی بۆ فرۆشتنی چەک ئاشکرا کرد و راگەیاند "لێکۆڵینەوە لە پێشینەی کڕیاری چەک وەک مەرج لەسەر فرۆشیار دادەنرێت."

کارین ژان پیێر، گوتەبێژی کۆشکی سپی رایگەیاند: "ئەوە بابەتێكی لۆژیکییە، چونکە هەموومان دەزانین پشکنینی پێشینەی کڕیار باشترین رێگەیە بۆ کەمکردنەوەی ژمارەی قوربانییان و رێگریی لە دوورخستنەوەی چەک لە دەستی تاوانباران؛ بەوپەڕی توانامان هەوڵی قەلاچۆکردنی پەتای تووندوتیژی چەکداری دەدەین کە خێزان، کۆمەڵگە و وڵاتەکەمانی پارچە پارچەکردووە."

ویلایەتە یەکگرتووەکانی ئەمریکا یەکێکە لەو وڵاتە کەمانەی جیهان کە تێیدا چەک ئازادانە دەفرۆشرێت و ژمارەی چەک لە ژمارەی دانیشتووانی ئەو وڵاتە زیاترە کە نزیکەی 340 ملیۆن کەسن.

بەگوێرەی ئامارە فەرمییەکان یەک لەسەر سێی ئەو وڵاتە چەکیان هەیە لانیکەم لە هەر دوو ئەمریکی یەکێکیان لە ماڵێکدا دەژیت کە چەکی تێدایە.

هەڵگرتنی چەک بۆ بەرگریکردن لە خۆکردن لە دەستووری ئەمریکادا هاتووە؛ بۆیە فرۆشتنی چەک بە کەسانی تەمە 18 ساڵ و بەرەو سەر یاساییە.

کۆمارییەکان پشتگیری لەو یاسایە دەکەن و پاڵپشتی لە کەمترین دەستوەردانی حکومی لەو بابەتە دەکەن و دژی ئەوەن کە پرسیار لە بارەی پێشینەی کڕیار بکرێت، ئەوەش پێچەوانەی سیاسەتی دیموکراتەکانە.

رێکخراوی 'ئەرشیڤی تووندوتیژیی چەک'ی ناحکومی ئەمریکی، لە ساڵی 2022دا 44 هەزار و 374 کەس لە ئەمریکا بە چەک کوژراون تاوەکو مانگی ئابی ئەمساڵیش 28 هەزار و 793 کەس بوونەتە قوربانی چەک؛ جگە لەوە 55٪ی رووداوەکانی خۆکوشتن لە ئەمریکا بەهۆی چەکەوەیە.

لە رێکارە نوێیەکەی ئیدارەی بایدندا هەروەها مەرجی 'تۆمارکردنی ژمارەی چەک' دانراوە، کە بەگوێرەی راگەێیندراوی وەزارەتی داد رێگە بە حکومەت دەدات بە دواداچوون بۆ چەکە فرۆشراوەکان بکات و بزانێت دەست چ کەس و لایەنێک دەکەوێت.