ترەمپ بۆ ئێران: ئەو تەنگە نەفرەتییە بکەنەوە ئەگینا رووبەڕووی دۆخێکی دۆزەخئاسا دەبنەوە

رۆژی یەکشەممە دۆناڵد ترەمپ، سەرۆکی ئەمریکا لە نووسینێکدا لە تۆڕی کۆمەڵایەتیی ترووس سۆشیەڵ نووسی: "سێشەممە (رۆژی وێستگەکانی کارەبا) و (رۆژی پرد) دەبێت لە ئێران و هەردووکیان پێکەوە لەنێودەبرێن". 

دواتر سەرۆکی ئەمریکا هەڕەشەکەی تووندتر دەکات و دەڵێ، ئەگەر داواکارییەکەی جێبەجێ نەکرێ کە بریتییە لە کردنەوەی تەنگەی هورمز، دۆخێک لە ئێران دروست دەکات کە وێنەی نابێ. 

ترەمپ لە هەڕەشەکانی بەردەوام دەبێت و ئاماژە بەوە دەکات، ئەگەر تەنگەی هورمز نەکەنەوە، ئەوا دۆخێکیان بۆ دەخوڵقێنێت وەک ئەوەی لە "دۆزەخ" بژین و دواتر بە بەرپرسانی ئێران دەڵێت: "بووەستن و چاوەڕێ بکەن (ئەگەر داواکارییەکەی جێبەجێ نەکەن، دەزانن چی دەکەین). 

سەرۆکی ئەمریکا لە کۆتایی پەیامە هەرەشە ئامێزەکەیدا سوپاسی خودا دەکات و وشەی (الله)ش بەکاردەهێنێت. 

ترەمپ باسی رۆژی سێشەممە دەکات، چونکە ئەو رۆژە ئەو مۆڵەتە تەواو دەبێ بۆ ئێرانی داناوە تاوەکو تەنگەی هورمز بکاتەوە یان رێککەوتن بکات.

رۆژی سێشەممە لە ئێران دەبێتە رۆژی وێستگەکانی کارەبا و رۆژی پردەکان، هەمووی پێکەوە لە یەک رۆژدا دەپێچینەوە. شتی وا هەرگیز نابێت!!! ئەو تەنگە نەفرەتییە بکەنەوە، ئەی زۆڵە شێتەکان، ئەگینا لەناو دۆزەخدا دەژین - تەنیا چاوەڕێکەن! سوپاس و ستایش بۆ "الله".